Inhlanganiso zikazulu lezihlobo zabotsheketsha osekwedlule inyanga bengaphumi emgodini wegolide omdala eStilfontein kweleSouth Africa bathi bafuna amapholisa angene emgodini ahlenge otsheketsha laba ngemva kwemibiko ethi kulamadoda ahlomileyo phansi emgodini abalela ukuthi baphume.
Iqula labotsheketsha abalitshumi lane -14 eliphume emgodini kushaft 10 phakathi kobusuku izolo batshele amapholisa ukuthi baphume ngentunja yenalithi bebalekela iqula labesilisa abahlomileyo okuyibo elivimba otsheketsha laba ukuthi bangaphumi.
Umgodi okuvalelwe abantu abanengi kweleSouth Africa
Abalitshumi lane laba bonke abayizizalwane zakweleMozambique, bathi ukudla konke okuthunyelwe yizakhamizi ngeviki ephelileyo, kuthethwe zingqwele lezi. Lezi zindaba esezilethe intukuthelo lokudana okukhulu kunkokheli zenhlanganiso zikazulu lemuli zabo tsheketsha laba bona abathi sekufuze amapholisa angene ayehlenga otsheketsha laba kulezi ziqhwaga.
UMnumnzana Mzukukisi Jam, isikhulumeli somanyano wenhlanganiso zikazulu esabelweni seNorth West iSouth African National Civics Organisations, utshele iStudio 7 ukuthi okubephula umoya yikuthi kudala betshela amapholisa ukuthi otsheketsha laba bafuna ukuhlengwa wona esithi abafuni kuphuma.
Umgodi osesabelweni seNorth West kweleSouth Africa
“Ibuhlungu ngoba besike sayitsho ngaphambili into uyokuba abantu abavalelekileyo apha bayakufuna ukuphuma. Kodwa amakwazi ukuphuma because imingxunya abebeyisebenzisa ukuze bakwazi ukuphuma besixelelwe ukuthi iye yavalwa ngamapholisa.”
Limbiko isilethe ukukhathazeka kakhulu kuzizalwane zeZimbabwe ezilezihlobo ezisemgodini lo. Owesifazana ongathandanga ukuthi izwi lakhe litshicilelwe nxa ekhuluma uthi umnewabo uselenyanga eziyizitshiyangalombili engaphumanga kulo umgodi osekubuhlungu nxa esizwa ukuthi uyaliswa ukuphuma.
Phakathi kwayonale iviki esinye isizalwane zeZimbabwe sifake umlayezo kuhlelo lokuxhumana olweWhatsapp sisithi kulabanye abantu abadinga izihlobo zabo ezathenjiswa imisebenzi eRustaernburg kwazwakala ukuba basezandleni zeziqhwaga lezi.
Kugcwele amapholisa phandle komgodi eStilfontein
“Ma ufuna umsebenzi bathi kunomsebenzi eRusternburg owokwakha. Ma senifika eRustenburg bafike bathengise laba bantu ebafaneni baBeSotho sebebafaka emgodini ngokwenkani hayi ngokuthanda,”
Ilunga lenhlanganiso ye Affected Mining Communities United in Action, uMnumnzana Bongani Jonas, uthi kubadanise kakhulu ukuthi iqula labahlengi elakhethwa nguhulumende obekufuze liqale umsebenzi lo lamhlanje lehlulekile ukuqala kwangabi lasizatho esiphiwa nguhulumende.
“Thina sifuna imission iqhubeke ngoba thina into ebesiyizelela yikuthi sizosaver abantu noku protector amahuman rights. So thina sisathi iyabonisa lento yokuthi abantu laba baphumile laba abantu badinga usizo underground. So singa delay sidonsa amanyawo ethu njengoba sesibonile ukuthi abantu bayadinga usizo.”
Amapholisa wona aqhubeka esithi ngeke angene phansi lapha emgodini ngoba otsheketsha laba bahlomile njalo kulemimoya eyingozi. Kusenjalo, umthwethwandaba weNorth Gauteng High Court ePretoria lamhlanje unqumo ukuthi lilungile inyathelo lamapholisa lokungavumeli ukudla lamanzi ukuthi kungene emgodini ukuze otsheketsha laba baphume.