Izihambi obe kumele zigade indizamtshina ye Air Zimbabwe ebanjelwe isikwelede samadollar edlula isigidi-$1,2million, yinkampani ye American General Supplies ngoMvulo ngeviki ephelileyo lokhe zithwele nzima.
Izihambi lezi ngoMvulo zixotshwe eHilton Hotel duzane le Gatwick International Airport eLondon lapho ekade sezihlaliswe khona yinkampani ye Skybreak (Pvt) Limited.
Zitshele iStudio 7 ukuthi inkampani ye Skybreak, elungisela izihambi zomhlaba wonke jikelele indawo yokuhlala emahoteleni eLondon, kayo isifuna ukubhadalwa isikwelede sehoteleni lesi esesizinkulungwane phose amakhulu amathathu amadollar-$260,00.
Zithi sezithethe isinqumo sokuyahlala emahofisini eAir Zimbabwe inkampani le ize ibhadale imali ye American General Supplies eyayithengisela insimbi zokuvuselela indizamtshina ngesikwelede kusukela ngomnyaka ka 2009 kuze kube lonyaka.
Umqondisi we Air Zimbabwe eEurope uMnu. David Mwenga uthi inkampani le iyazama ngamandla wonke ukubhadala isikwelede lesi loba nje kusekude phambili ukuthi indizamtshina ye Air Zimbabwe ikhululwe ngamagqwetha eAmerican General Supplies athi kawasoze ayikhulule imali yonke ize ibhadalwe.
Okwamanje iAir Zimbabwe ithi isibhadale imali yonke loba nje amagqwetha eGeneral Supplies esithi sokubhadalwe isigidi samadola eMelika kuphela.
Umnu. Ezra ‘Tshisa’ Sibanda omele izihambi lezi uthi sebekhathele njalo sebengene ngenkani emahofisini eAir Zimbabwe.
