Izifundi ezilitshumi lanye ezivela esikolo se-Inala Country School Esigodini, eMatabeleland South, zikwele Melika ukuzofunda okutshiyeneyo phansi kohlelo lwe-Youth Ablaze Global Exchange.
Izifundi lezi zethekelela amakolitshi emfundo yaphezulu ngenhloso yokuthapha imfundo ejulileyo njalo lamasiko eMelika lokunye.
Owasungula inhlanganiso yeYouth Ablaze Global, uMnu. Mlungisi Mhlophe, uthi uhlelo lolu luzakupha izifundi ulwazi olugoqela olobukhokheli kanye lezamabhizimusi
“Mayebuyela umntwana sifuna ehambe ephethe into ebambekayo, Sakha ikusasa elihle Labantwana bethu ukuze baphile impilo enhle ukwedlula esayiphilayo.”
Lonyaka inhlanganiso yeYouth Ablaze Global ibambisana lesikolo se-Inala Country School ngenhloso yokuthuthukisa abantwana bemaphandleni. Umqondisi wesikolo lesi, uMnu. Qiniso Mpofu, uthi uhlelo lolu luzaphathisa kakhulu abatsha.
Inala Country School Students in America for a Youth Ablaze Global Exchange Program
“Indikimba yikubumba umuntu ophelele, ephelele enthweni zikamoya, abekwazi ukuthi ubuciko bezandla buyamsiza umuntu, aphinde futhi aphelele ekukhokheleni abe ngumuntu olokuqedisisa ngokwenzakala emhlabeni.”
Omunye wezifundi lezi ezikwele Melika nguKuyanda Sibusiso Moyo.
“Silapha sibuye ukuzofunda ngamasiko abanye, lathi sibafundisa amasiko ethu esawafundiswa ngabadala. Sikhangelele ukuthola ulwazi olugcweleyo silapha.”
Umbalisi ofundisa eInala Country School obuye labantwana laba eMelika, uNkosazana Paula Paloma, uthi ukhangelele ukuthi bazabuyela belolongekile.
“Esikukhangeleleyo yikuthi abantwana behambe sebekwazi ukuthi bafuna ukwenzani ngelakusasa labo. Ngoba ukuza lapha kubapha ithuba lokulolonga abafuna ukukwenza empilweni.”
Uhlelo lwe-Youth Ablaze Global Exchange Program lwasungulwa nguMhlophe, owazalelwa koBulawayo, eZimbabwe, njalo okwamanje ohlala eVirginia eMelika. Phansi kohlelo lolu, izifundi lezi zizakwethekelela indawo ezigoqela amakolitshi, ama-museums, amabhizimusi kanye lendawo zokuzilibazisa.
SEE ALSO: Udaba Lwezifundi ze-Inala eziseMelika Esilwethulelwa nguTaboka Ncube.