EleBotswana lazise umakhelwane walo ukuthi lifuna bonke abeZimbabwe abangaphezu kwenkulungwane abasemajele ezweni lelo ukuthi baphindele ekhaya ukuyaqedisa izigwebo zabo bekibo.
Umphathintambo obona ngezomvikela umnunzana Shaw Kgathi uthi ukhulume lomunye wakhe eZimbabwe umnunzana Kembo Mohadi ukuthi abasemajele bezweni lakhe babuyiselwe kibo ukuyaqedisa izigwebo.
Umnunzana Kgathi ubekhuluma lentathelizindaba ngemva kokufika evela eZimbabwe lapho angene khona umhlangano wezomvikela phakathi kweZimbabwe leBotswana.
UKgathi uthi bafake umbono lo phambi kwabanye babo beZimbabwe ukuthi bonke abagwetshelwa amacala eBotswana bayopika emajele eZimbabwe.
Lokhu kuza ngemva kokuba umthethwandaba weBotswana unqume ukuthi abapika emajele abakwamanye amazwe kumele banikezwe amaphilisi okulwisana lengculaza ama ARV.
Ababili eZimbabwe abaphila legcikwane elibangela ingculaza yibo abahambisa uhulumende emthethwandaba.
OweZimbabwe umnunzana Casper Nkomo olesihlobo entolongweni uthi uhulumende weBotswana engabe esindwa linani labeZimbabwe abasemajele kumbe ecunulwe yikuthi ababili abeZimbabwe bamhambisa emthethwandaba phezu kodaba lwama ARVs.
IZimbabwe yiyo elenani eliphezulu, ngaphandle kwabeBotswana, emajele eBotswana ngesikhathi kulenengi elingena kulelizwe okungekho emthethweni.
Umhlangano obe useVictoria Falls uhlafune lodaba oluyimpica lwabeqa umngcele okungekho emthethweni, iBotswana itshela iZimbabwe ngokungahlaliseki ngalomumo.
Your browser doesn’t support HTML5
Udaba lwezibotshwa zeZimbabwe emajele eBotswana