Izakhamizi ezihlala esigabeni seHwange zithi sezilamba okokuthi abantwana labadala sebephila nzima ngenxa yokuswela ukudla kulandela isomiso esesabekayo esibangelwe yisikhudumezi somkhathi ese-El Nino.
UNkosikazi Anna Maseko wesigodlweni senduna uMvuthu uthi emizini ayisabekwa, njalo sibi sokwabelana okuya ethunjini sekulukhuni.
“Akulalutho, labantwana besikolo kunje abalamphako esihamba sibanike wona. Sidla kanye, unganatha itiye uyaze uyekudla isitshwala ntambama.”
UNkosikazi Maseko uthi umgodla wempumphu ongamagalani amabili kufuze udliwe kuze kwedlule amaviki amane, kodwa lokhu kutsho ukwengezwa kokuyatha ikakhulu ebantwaneni.
“Umntwana bake bamdobha emgwaqweni seyatha ngendlala, engasenelisi ukuhamba. Sibi sowami umzukulu ngingekho ngiyesililweni ngimbizelwe kuthiwa sekunzima ekhaya kungelangitsho lempuphu.”
UNkosikazi Hlengiwe Sibanda uthi basesimeni lesi ngenxa yokungani kuhle kwezulu. Uthi indlala le iphazamisa kakhulu abafundi.
“Aluba siyabe sivunile uyathi aluba bazathwala igwadla, manje uyabuya athi mama ngilambile bengitshaywa likhanda esikolo, ethi besekuyindlala esikolo lamanzi awanatheki ngoba ayatshila. Sidla nje kanye ngelanga.”
UMnumzana Kolisi Sibanda usabhuku weBH10 phansi kwenduna uMvuthu uthi banengi asebelala beyatha, njalo lokuhola ukudla kwe Social Welfare kuyaxega nje, akweneli.
“Bakhona asebelala nje. Abantwana abasadli besiya esikolo, njalo omunye engacuphela umakhelwane kusuka kungeneli laye abantwana bakhe becine beswela.”
Umfelokazi uSibusiso Ncube laye uthi ukudla kokuhola okweneli.
“Siyahola amagabha lawo awasifikisi ndawo, inyanga isiyaphela kuyabe sekuphelile. Mina ngigcine ugogo ole 86 years ele BP, kodwa angenelisi ngoba kumele edle mbijana mbijana kodwa ngesimo lesi asikwanisi.”
Esethula ukusebenza kwesikhwama sengcebethu yakuleli kusukela ekusungulweni komnyaka lo, umphathintambo wogatsha lwezomnotho uMnumzana Mthuli Ncube wabika ukuba isabelo seMatabeleleland North silabantu abalambayo abedlula inkulungwane ezedlula amakhulu amahlanu -540,000, kodwa kulaba, uhulumende uphathisa ihlekana labalitshumi lasithupha ekhulwini-16 percent okuyikho okuyathisa izakhamizi zakoMvuthu.
Kwabaholayo, uhulumende ubapha igalani eyodwa umuntu munye ngamunye.
Kusenjalo, udokotela omkhulu wesigabeni seHwange, uFungai Musinami, uthi lumango ulabagulayo abanengi okubangelwa yindlala. Uthi welaphe abanengi ikwashiokor, kubalela abakhulileyo, abakhubazekileyo, labantwana.