Izakhamizi zeMatabeleland South ezisemangweni wakoThibeti kusiya eTshanyaugwe eGwanda South zikhala ezimathonsi ngezifuyo ezitshontshwa ngamasela wona asevula lezibayeni.
Izakhamizi zithi ziyakhathazeka ngokutshontshwa kwezifuyo zazo njalo sezihlalela evalweni ngoba zisithi lawamasela alodlame.
Izifuyo ezitshontshwa kakhulu esabelweni seZansi yemaNdebeleni zibalisa inkomo, imbuzi labobabhemi.
UMnu. Hluphe Siziba yisakhamuzi sakoThibeti eKalange eGwanda South, uthi baleminyaka emine befuye imbuzi beliqembu leRenalitsepo Goat Project kodwa bangabayanga ngenxa yamasela.
UMnu. Tsepang Moyo oyisakhamuzi seNhwali eGwanda South uthi ziphelile lembuzi ngenxa yamasela.
UMnu Nathaniel Moyo ngusobhuku weNdibe Line eSinai eGwanda South, uthi sebesesaba lokubikela amapholisa lapho betshontshelwe ngoba kungekho okwenziwayo kulawamasela.
Amazwi akhe asekelwe nguNkosikazi Viviene Ndlovu isakhamuzi seKalange laye ochothoza umsebenzi wamapholisa.
Isikhulumeli samapholisa eZansi yemaNdebeleni uMnu. Philisani Ndebele uthi sikhuluma nje kuleqembu lamapholisa eliphume ijumo ukuyadinga la amasela ezifuyo endaweni yeTshanyaugwe lapho abhahe khona.
Uthi abalezikhalazo ngendlela abaphathwa ngayo ngamapholisa ngemva kokutshontshelwa izifuyo zabo kumele bahambe esikolo seTshanyawugwe bayebona omkhulu wamapholisa khonale uMnu Kadzura.
Your browser doesn’t support HTML5
UAlbert Ncube Uyalandisa