Inengi labantu abaphathekileyo emzimbeni abasila emkhuhlaneni wesihudo esehlele izakhamizi zemzini weLuveve koBulawayo ngemva kokunatha amanzi angcolileyo ayehlangane lalawo aphuma ezambuzini, bamukele njengabulo langokubonga isipho soncedo lokudla abaluthole kwabe bandla leZAPU
Isihudo esiqhamuke emzini weLuveve ngenyanga edluleyo sibulale abambalwa ikakhulu abantwana, abanye abangafika phose inkulungwane begula belaliswe ezibhedlela abanye begula bengekhaya.
Izakhamizi zeLuveve zithola uncedo lokudla oluvele kwabeZAPU
Umgcinisihlalo weBulawayo Progressive Residents Association eLuveve kuWard 15, uMnu Ndaba Ngoma ubonge isipho abasithole lamhlanje ethi amanzi sebewathola kulezi insuku kodwa abakawathembi njalo ikhansili isike yafika yakhulumisana labo.
“Siyabonga isipho esisthole lamhlanje salabo ababhekana lodubo kakhulu. Amanzi sesiwathola lapha eLuveve awasavalwa kodwa abantu sebewesaba amanzi la. UMayor uMnu Solomon Mguni usekewazofika lapha ezoxolisa ngenkulumo ezike zabakhona ziphuma ekhansilini ezikhube uzulu”
Esinye njalo isakhamuzi seLuveve esithole isipho sokudla, uMnu Kaunza Makawi laye ubonge kakhulu ngesipho asitholileyo.
“Siyabonga ngesipho esisithole lamhlanje kugathi ngabe bayaphenduka njalo bazosisiza sibuyele kuzolo siphile kuhle Siyabonga isipho abasiphathele sona.”
UNkosikazi Joyce Dliwayo wabanye abathole isipho sokudla lamhlanje ukhala ngomzukulu wakhe owaphepha ekunatheni amanzi alobulongwe babantu osexathuka umzimba.
IUmntwana osesinde kusihudo samanzi eLuveve osexhathuka ezandlenni
“Ngiyabonga ngosizo esiluthole lamhlanje kodwa bhekani libone ukuba umzukulu wami uyisimo bani. Ubelalisiwe esibhedlela seMpilo uthe ephuma ubexathuka njengoba limbona enje ngibuhlungu. Okwamanje sithola ukwelatshwa ekilinika yeLuveve.”
UMgcinisihlalo weZAPU eMatabeleland South, uMnu Matthew Sibanda uchaza izipho abazinikeze uLuveve lamhlanje.
“Size ukuzokupha izakhamizi zeLuveve ezigulayo labafelwayo singakhethi ukuthi umuntu ngowaliphi ibandla. Sibaphe impuphu, itshukela, icooking oil isawudo, isepa yokuwatsha, amahlamvu lesepa yokugeza.”
Inengi labantu eLuveve liphathekile emzimbeni njalo abantu lokhe besifa kuthi abanye lokhe belalisiwe esibhedlela seMpilo Central Hospital kuthi abakhutshwa esibhedlela baqhubeka bethola usizo ekilinika yeLuveve.
Umphathi wezempilakahle kumaninsipala wedolobho lakoBulawayo, uDokotela Edwin Sibanda NgoLwesibili uchaze umonakalo osudalwe ludubo lwamanzi koBulawayo ethi kulabantu asebefike emakilinika akoBulawayo leLuveve bephethwe yisihudo kusukela mhlaka May17 kusiyafika mhlaka July 3 abayi 1 800 kuthi asebesitshiyile balitshumi lantathu abanye babhubhele endlini.