Izakhamizi zeKillarney Squatter Camp koBulawayo zikhala ngokuthi zibhekane lenhlupho ezehlukeneyo lanxanje inengi lisithi selahlatshwa ijekiseni yokuzivikela kuCovid-19 indlela eseziphila ngayo seyaguquka sokunzima ukuselela imuli ngenxa yeziqondiso zeCovid-19.
Ngesikhathi inengi labantu bakoBulawayo livukela emakilinika ukuyadinga ukuhlatshwa ijekiseni lokuzivikela kuCovid-19, abahlali beKillarney Squatter Camp balenhlanhla yokuthi balandwa ngabezempilakahle ukuzobahlaba.
Omele abahlali beKillarney Squatter Camp uNduna uMnu Tonny Ndlovu uchasisa ukuba lanxa sebahlaba ijekiseni leCovid-19 Vaccine, lokhu bebhekane lobunzima.
"Lapha eKillarney Squatter camp sibhekane lenhlupho ezinengi, abafundi abayi esikolo, kulabantu abasithatha izithombe singazi ukuthi bazisebenzisani njalo thina sabalethuba elihle wonke umuntu sewahlaba ijekiseni elivikela iCovid-19 njalo akulmuntu osekewagula iCovid"
UNkosikazi Nompumelelo Dube ohlala eKillarney Squatter Camp uthi kunje abafundi abayi esikolo.
"Zinengi inhlupho esibhekane lazolapha, abafundi abayi esikolosihleli labo emakhaya, sihlala siminyene njengezimuli sikhangelele ukuthola imfundiso ngeCovid kanye lokuthola usizo lokutholiswa indawo zokuhlala."
Osakhulayo ohlala eKillarney Squatter Camp, uNkosazana Thandekile Ndlovu uthi isimo seziqondiso zokumelana leCovid 19, sesimenza aswele umsebenzi.
"Angilamsebenzi kuhlanganisa lokudla ngoba ngesikhathi seCovid-19 lockdown kulandelwa iziqondiso kubenzima ukuyadinga umsebenzi."
UMsekeli kaMeya wedolobho lakoBulawayo uKhansila Mlandu Ncube uthi iKhansili ayibavumeli abantu abahlala edolobheni okungekho omthethweni.
"Njengedolobho lakoBulawayo sivele asikhuthazi abantu abahlala endaweni ezingekho emthethweni.Eminyakeni emihlanu edlulileyo sabatholela indawo bayakhelwa eMazwi kuthi abanye sasibatholele indawo eMillenium kodwa abanye babo sebasuka batshiya befake amalodger abanye bathengisa sebesiyahlala eKillarney."
EKillarney Squatter Camp kuhlala imuli ezedlula ikhulu lamatshumi amabili. Akula manzi okunatha ahlanzekileyo, izambuzi, ikilinika lesikolo njalo inengi labo liphila ngokuzisebenza. Bathi kusuke kwabanzima ngesikhathi ilizwe liphakathi kweziqondiso zeCovid-19 ngoba bacine bephelelwa zindlela zokuzinakekela.
Your browser doesn’t support HTML5
Udaba lwabahlali beKillarney siluphiwa nguAnnahstacia Ndlovu