Minyaka yonke izakhamizi zeHwange bezifelwa yizifuyo, zidideka ukuba mhlawumbe zidle umahamba ngendlwane kumbe umkhawuzane. Bekwande njalo ubuphofu ezifuyweni, ilakhulu inkomo, lokudletshwa nje kwesikhumba, kanti yiso isihlahlakazana lesi se lantana camara, abanye bathi yibuhobe.
Ngokuya kwesikhathi, bethekelelwa ngabaqhuba uhlelo lweAmalima Loko, olusekelwa luhlangothi lukahulumende weMelika olukhangelane lenswelo zikazulu olweUS Agency for International Development, ababonisana baphuma lombono wokuyihlasela li lantana camara.
Bageca ubuhobe obubulala izifuyo lamabele. (VOA)
Okhokhela izizakhamizi kuhlelo lolu olulabantu abedlula ikhulu -111, uMnumzana Alroy Sibanda, uthi isihlahlakazana lesi sibangela njalo umkhuhlane we-anthrax.
“Yikho siyikhipha siyibuthelela ukuze ingamemetheki ngoba lokhu kuyabulala izihlahla, utshani, yonkinto.”
Osakhulayo, uNkosikazi Petronela Ncube, ithi iyingozi i-lantana camara.
“Lapha bekungahambeki, izinyoka bezikhona lezinyamazana kodwa le yindawo ehamba abantwana bedlula besiyesikolo, njalo lesisihlahla amahlamvu aso ayi poison enkomeni ngoba ziyasidla.”
UMnumzana Nkanyezi Moyo laye uthi izifuyo beseziphele du. Njengezakhamizi, bavukela nsukuzonke egangeni, okwamalanga alitshumi lanhlanu ngeviki.
Ugeca ubuhobe esigabeni senduna uMvuthu. (VOA)
“Izolo izifuyo zethu bezingelamadlelo, izifuyo zisifa, sithe sisithole ulwazi sathi ngcono siyikhiphe.”
Umkhokheli wezokweluswa kwamadlelo lezifuyo koMvuthu, uMnumzana Nicholas Ncube, uthi iAmalima Loko iyababonga ngemali kwesinye isikhathi.
“Ungayizuza i$30 uyathenga impuphu ngoba lonyaka kulendlala embi so usebenza uqinile, labantwana uyabhadala ischool fees.”
UNkosikazi Sisasenkosi Ndlovu uthi uhlelo lolu seluvuselele umganga, njalo lwabalethela inzuzo etshiyeneyo.
Isihlahlakazana sobuhobe esizatshiswa. (VOA)
“Siyathengela abantwana ukudla loba imali incane siyathenga impuphu njengoba khathesi kuyindlala lehlelweni savalelwa phandle.”
UMnumzana Dominic Graham, umholi wenhlanganiso yeMalima, uthi injongo yabo yikuphathisa isabelo sonke seMatabeleland North ngezemvelo.
“Ekuvundiseni umganga, injongo yethu yikuthi izifuyo zithole ukudla okweneleyo lokubalempiloenhle.”
UGraham uthi bona bakholwa ukuba uzulu ukuze abe lempilo enhle, lokhu kufuze kuqalele ezifuyweni ukuze abantu badle ukudla okwakhayo.
Uhlelo lokugeca i-lantana camara lukhona njalo eBinga leNkayi.
Okunye oluqhutshwa phansi kohlelo lolu ngokokunakekela abantwana abancane labomama abakhulelweyo ngelambazi elihloliweyo.
Sebegebhise njalo imigodi yamanzi, kwasungulwa izivande, kanye lokunye okuphathelane lokulondoloza imvelo loluntu.
SEE ALSO:
Udaba Esilwethulelwe NguNokuthaba Dlamini