Izakhamizi zeGwanda zithi impuphu ethengiswa emalokitshini ilentengo ephezulu kakhulu njalo ithengiswa ngeRand lakweleSouth Africa.
Bekulokuxokozela okukhulu ngoLwesithathu esitolo sakoMkoko lapho izakhamizi zeGwanda ezedlula amakhulu amabili ezibalisa amapholisa kanye labongi bezifuqana zifuna ukuthenga impuphu yona etholakala nzima kulezinsuku.
AbeGwanda belayinele ukuthenga impuphu
Laloba uhulumende efake isiqondiso sokuthi abantu bazivalele ezindlini ukuze kwenqatshelwe ukumemetheka lokuthelelwana kwegcikwane leCorona Virus inengi liphuma endlini ngenxa yendlala.
Isakhamuzi seSpitzkop North, okhethe ukubizwa ngokuthi nguMaNgwenya uthi laloba besazi ingozi abazifaka kiyo ngokuphuma ezindlini uthi akuncedi ukuhlala endlini abantwana bengalakudla.
“Lamhlanje impuphu sibuyile kodwa liyawubona lani liyawubona umumo wabantu ukuthi unjani , kuthwe sibuyele emuva singathinthani, yebo umkhuhlane siyawesaba kodwa kufanele sidle , impuphu kazingene ezitolo zibe zinengi njengoba bethe izitolo ezithengisa ukudla zingavalwa azingene ezitolo zibe zinengi impuphu ezikhona yimpuphu ezidulayo esingakwanisiyo ukuzithenga laphana phambili ikhona kodwa ngabo R200 imali engingelayo mina ukuyisebenzisa eZimbabwe,” kutsho uMaNgwenya.
Laloba impuphu itholakala kwezinye izitolo iyabe ibiza amaRand angamakhulu amabili lengxenye-R250, emgodleni olesisindo samakilogram alithumi-10kg okudala ukuthi inengi ligijimele elentengo ephansi ngoba lingelamali.
UNkosazana Preety Ndlovu uyethesa amapholisa umlandu wokuqilibezela lapho kuthe kwaba lempuphu .IStudio 7 lawo izibonele ngawayo amapholisa ehamba phambili ukuyathenga impuphu.
“Abantu abazothenga uzabona bebuya begqoke amakepesi lamayunifomu ngamapholisa abuya ukuzothenga koMkoko , thina abantu esingasobafazi bamapholisa abangasoni yamapholisa uzalayina uze ufeyintele elayinini bona babe belokhu benzene bephuma labantu babo , ilayini yakhona uzakuma ekuseni kuze kuyetshaya u5 on top of that sengisiyathengiselwa impuphu yakho R250 imagine!, kutsho uMaNdlovu.
Kusenjalo izizalwane zakwele Ethopia ezilitshumi lanhlanu ezibotshwe eSwitsha izolo zimiswe phambi komthethwandaba lamhlanje zisetheswa umlandu wokungena elizweni okungekho emthethweni.
UMantshi uthe baphenduke emthethwandaba mhla zingamatshumi amabili lambili kulinyanga, okwamanje bavalelwe enkantolo yeGwanda.
Oyedwa obethwalelwe esibhedlela ngoLwesibili utholakale elomkhuhlane woqhuqho lweMalaria hatshi iCoronavirus.
Isikhulumeli samapholisa uAssistant Commissioner uMnu Paul Nyathi uthi amapholisa asadinga izizalwane zakuleli ezimbili okubikwa zincedise leziziphepheli ukungena elizweni.