Ukhetho selusele lensuku phose ezingamatshumi amabili kuphela ukuthi lwenziwe kodwa koBulawayo kuthulisile akutshengiseli ukuthi kuzakuba lokhetho olulenani labancintisayo eliphezulu okungakaze kubonakale kumbali yelizwe.
NgoMgqibelo khona bekuzithulele zwi koBulawayo lanxa kubikwa kuke kwabonakala abalutshwana abazancintisa besenza imhlangano emincinyane.
Idolobho lako Bulawayo lilabantu abafuna ukuncintisa ukuba ngamalunga edale lephalamende abangaphezu kwamakhulu amabili, 200 kodwa kulezihlalo ezilitshumi lambili kuphela, 12.
Izakhamuzi zakoBulawayo zithi ukuthulisela okukhona kuyasolisa. Umnumzana Nkosikhona Ndlovu uthi ukungakhankasi lokhu kuyabasolisa. Uthi kukhankasa amabandla amadala anjengeMDC kanye lele ZANU PF.
Kodwa lawo lamabandla awatshengisi idlabuzane. UNdlovu uthi ekhaya lapho avela khona amabandla amatsha abawafunayo awabonakali.
“Abantu abakhankasayo yibonabo abamaparty esiwaziyo lalonalelo eliseduze elincintsayo, abamaparty esiwafunayo sibazwela koBulawayo kuphela, kodwa ukhetho sibona luyasondela ngelanga ngelanga,” kutsho uNdlovu.
Isakhamuzi sakoBulawayo unkosikazi Thalitha Sibanda uthi lapho asuka khona kulabantu abafuna ukuncintisa abangamatshumi amabili kodwa ababonakali ethi kukhankasa abantu ababili kuphela.
Kutsho uSibanda: “Into engimangalisayo yikuthi abantu abafuna ukuvotelwa ababonakali mina lapho engihlala khona kulabantu abafuna ukuncintisa abangu 22 kodwa kukhanya ababili kuphela abe MDC labeZANU PF. Sifuna ukuthi abantu bonke bakhaye ukuze sazi ukthi kuyiwangaphi ngokhetho lolu.”
Umnumzana Abel Moyo isakhamuzi sakoBulawayo uthi inani labantu abafuna ukuba ngamalunga edale lephalamende linengi kakhulu njalo usola ukuthi kungani abanye bazophambanisa ukhetho.
“Kulamacandidate amanengi kodwa sifuna abantu abangu 12 kuphela, kungani laba abanye ngabantu ababuye ukuzophambisa kuphela,” kutsho uMoyo.
Ukuthulisela okukhona endaweni zeMatabeleland kwenza uzulu asole ukuthi inengi labancintisayo ngabazophambanisa ukhetho. Enyangeni edluleyo uphenyo olwenziwa ngabeAfrobarometer lwaveza ukuthi amabandla amanengi amatsha awaziwa nguzulu.
.
Your browser doesn’t support HTML5
Udaba Silethulelwa nguBathabile Masuku