Izakhamuzi zakoBulawayo zithi uhulumende kumele akhangele udaba lwenkohlakalo ngeso lokhozi ngesikhathi abaphathintambo bengatsha zikahulumende beveza obala ukuthi balenotho enganani njalo lokhu bakwenze mgceke hatshi ensitha njengalokhu okuthiwa bamele bakwenze
Lokhu kuvele emhlanganweni obuqoqwe zinhlanganiso ezizimeleyo ezigoqela eyeCrisis in Zimbabwe Coalition le National Youth Development Trust lezinye ezimbalwa. Izakhamizi zikhulume kabanzi ngobandlululo kanye lobugwelegwele obubulala umhlubulo wemaNdebeleni bethi kufanele uhulumende achaze ukuthi abantu abaphiwa inyanga ezintathu ukubuyisela imali abayisusa elizweni besiyayigcina ngaphandle kwelizwe ngobani njalo balethe malini.
Ekhuluma emhlanganweni lo umqondisi wenhlelo zenhlanganiso ye Transparency International Zimbabwe (TIZ) unkosikazi Sibonokuhle Ncube uthi uzulu ufisa ukuthi uhulumende ahloniphe isisekelo sombuso, kungakhethwa amasela abotshwayo njalo kubotshwe ikakhulu amasela atshontsha imali lempahla enengi hatshi okuncane njengalokhu okwenzakalayo.
Umqoqi wenhlelo zeCrisis in Zimbabwe coalition uthi injongo yomhlangano lo ngeyokuthi izizalwane zeZimbabwe zenelise ukukhuluma imbono yazo mayelana lobugwelegwele phambi kweziphathamandla zikaHulumende ukuze kuthathwe amanyathelo athize ngabo. Uthe lokhu bazakwenza emadolobheni wonke aweZimbabwe.
Osebenza lenhlanganiso ezizimeleyo uMnu. Michael Ndiweni uthi, inhlanganiso ezimele uzulu kumele zisebenze gadalala ukuthi zifuqe uhulumende alwisane lobugwelegwele njalo afake imithetho ezaphoqa amalunga edale lephalamende lezisebenzi zikahulumende ukuthi ziveze inotho yazo lokuveza amagama alabo abazaletha imali abebeyigcinise ngaphandle kwelizwe lokuthi yimalini abayilethileyo.
Olwela amalungelo oluntu umnumzana Mbuso Fuzwayo, uvumelane loNdiweni ethi akumelanga ukuthi amasela axolelwe kuphela kungakhulunyiswananga njalo kufanele ukuthi uMongameli Emmerson Mnangagwa aveze ukuthi yena ulethe malini ayeyigcine ngaphandle kwelizwe. Uthe okwenzakala khathesi kubotshwa amalunga ohlangothi lweG40 akulunganga ngoba ayisibo bodwa abakade betshontsha.
Uzulu usola kakhulu ukubotshwa kwamalunga ohlangothi olulodwa olweG40 kuZANU-PF olwalusekela uNkosikazi Grace Mugabe kungela ngitsho oyedwa owohlangothi lwe Larcoste olwalusekela uMnangagwa.
Your browser doesn’t support HTML5
Udaba Silethulelwa nguBathabile Masuku