Ibandla le Zanu PF likhanya selibhekane lolunye njalo udubo lokudonselana kulandela amandla abikwa ekuxuku eseliphiwe igama lokuthi yiGang Of Four.
Lelixuku elibalisa aboMnu. Jonathan Moyo, Saviour Kasukuwere Patrick Zhuwao loNkosazana Oppah Muchinguri libikwa kuyilo elakhokhela ukuxotshwa kukaNkosikazi Joice Mujuru labanye. Udubo oseluqhamukile ngolokuthi ixuku leli libikwa selixophana lomsekeli kamongameli, uMnu. Emmerson Mnangagwa owayesekelwa yilelixuku ekuxotshweni kuka Mujuru.
Ixuku leli lalisekelwa ngabasakhulayo ababuthana epulazini likaNkosikazi Grace Mugabe eMazoe bazisa njalo ukuthi bazasekela uMnu. Emmerson Mnangagwa. Kodwa unobhala obona ngokuqondiswa kwenhlelo zogatsha lwabatsha, uMnu. Lewis Matutu utshele intathelizindaba izolo eHarare ukuthi sebekhathazwa ngamazwi asetshenziswa ukuthuka inkokheli esanda kukhethwa.
UMatutu uthe ikhona impehla ebandleni esifuna ukudiliza ibandla. Sixoxe lelunga le Central Committee yebandla, uMnu. David Ndlovu othi akula okubi okwenzakalayo ebandleni.
Kodwa ingcwethi ecubungula ezombusazwe, uMnu. George Mkhwananzi utshele iStudio Seven ukuthi osekwenzakala kubandla leZanu PF kutshengisela ukuthi lelibandla lilakho ukudabuka phakathi ngasiphi isikhathi.
Your browser doesn’t support HTML5
Ingxoxoxo loMnu. George Mkhwananzi