Intathelizindaba zeZimbabwe zithi umuyi uWilliam 'Bill' Saidi wayeyindoda eyayibhala imbono yayo lalokho okwakusenzakala elizweni ngendlela ephezulu.
Zithi uSaidi, obhubhele kwele Zambia lapho akade eyethekelele khona umzali wakhe ogulayo, wayezama ngamandla wonke wokuthi akubeke sobala okwenzakala elizweni.
Eyinye yentathelizindaba encome umsebenzi kaSaidi nguMnu. Cris Chinaka othe kubhubhe umaqhuzu kwezokubhala indaba.
UChinaka uthe uSaidi wafundisa abantu abanengi ukuthapha lokubhala indaba eZimbabwe lakuzwekazi leAfrica.
Eyinye njalo Intathelizindaba, uMnu. Columbus Mavhunga, owasebenza loSaidi kuphephandaba leDaily News lakunhlanganiso yeMedia Institute of Southern Africa, uthe uSaidi wayewuthanda umsebenzi wakhe njalo ethakazelela ukufundisa abanye ukuthapha lokubhala indaba.
Kodwa kulabanye abantu abathi uSaidi wabhala kubi ngabantu beMatabeleland leMidlands.
USaidi wasebenza kumaphephandaba eZimbabwe Newspapers Group, Daily News, Daily News on Sunday, Horizon Magazine lamanye kwele Zambia leSouth Africa.
Wabhala amabhuku amanengi agoqela elethi The Hanging, Return of the Innocent lelithi Days of the Baboon.