Umgcinisihlalo weSouthern African Lawyers for Human Rights, uMnu Talent Rusere, owabotshwa mhlaka 23 Mpalakazi ePlumtree esetheswa umlandu wokuphuma elizweni engela maphepha kanye lokukhupha imibiko ekhuthaza udlakela kweleMozambique lasemhlubulweni weSADC, uzaqhubeka evalelwe eremand prison.
URusere obezimele edale likamantshi uyawalandula amacala la njalo ucele ukuba akhululwe ngesibambiso, ibail.
Ocwayisisa loludaba uDetective Sergeant Edmore Chimera uphikisane lesicelo sikaRusere esithi bazakhupha ubufakazi bokuthi wephula imithetho emibili le.
URusere utshele inkantolo ukuba watshaywa kabuhlungu ngamapholisa ngesikhathi ebotshwa.
Icala leli liza ngemva kokuba uRusere ephume enkundleni zokuxhumana ebulenjini kanye lakweminye imisakazo esithi kulezizalwane zeZimbabwe ezavota kukhetho lweMozambique. Kodwa uhulumende weZimbabwe uyakwala lokhu.
Kubikwa wakhuthaza ukuthi amazwe asemhlubulweni wezansi yeAfrica ukuba aqale ukutshengisela lawo ephikisana lempumela yokhetho lweMozambique.
Abantu abafika phose amakhulu amathathu, 278 sebebulewe kudlakela oluqhamuke eMozambique kulandela ukwaziswa kwempumela yokhetho.
Umanyano weSADC ukhuthaza iziphathamandla zezombusazwe eMozambique ukuthi zimise udlakela lolu, njalo eleSouth Africa selithumele iziphathamandla zalo ezizama ukuphathisa amacele alwisanayo ukuthi akhumisane umlotha.
SEE ALSO: Ingxoxo loMnu Rejoice Ngwenya.