Isiphathamandla sezempilakahle esigabeni se Gwanda sesiveze ukuthi kulemota ezimbili kuphela zokuthwala abagulayo, ama ambulance, kulesi sigaba okubangele ukuthi inkampani yakhe egebha isamende ippc yethule isipho se ambunance esibhedlela seMtshabezi Mission ngoLwesihlanu.
Lokhu kuvezwe emkhosini wenkampani enkulu yesamende iPPC wokwethula isipho seambulance le.
IZimbabwe ngelinye lamazwe ahamba phambili ngenani eliphezulu labomama abafa bebeletha.
UDokotela Andrew Muza umqondisi wezempilakahle esiqintini seGwanda uthi esinye sezizatho esidala lokhu yikuswelakala kwezimota ezithwala izigulane ama ambulance ikakhulu ezibhedlela lase makilinika asemaphandleni.
UMuza uthi okwakathesi izimota ezithwala izigulane zimbili kuphela esithi eyodwa isesibhedlela seManama kukanti eyinye isedolobheni leGwanda kungenani lokuthi kulabantu abazinkulungwane ezilikhulu lamatshumi amane 140 000 kulindawo.
Wengeze ethi ulethemba lokuthi inani labomama abafa lapho bebeletha lizehla kulandela isipho semota yezigulane ekhitshwe ngabenkampani elungisa isamende eyePPC.
Umqondisi wePPC eCollen Bawn uMnu. Allan Tshabangu uthi inkampani yakhe ithola inzuzo kuzulu ngakhoke kungumlandu wayo ukubisela ingxenye ngokuphatheka kunhlelo ezifana lalezi esithi ngaphambilini bancedise isibhedlela esikhulu seGwanda ngokuthuthukisa indawo okugcinwa khona abantwana lapho begula.
UNkosazana Isabel Ndlovu isakhamuzi seMtshabezi kuWard 6 uthi limota izasiza kakhulu omama abazithweleyo lapho sekuthe kwaba lengxaki sokumele bagijinyiselwe ezibhedlela ezinkulu.
Ukhansila kaWard 6 uMnu. Kennon Sikula uthi Izakhamizi besezibhekane lobunzima bokuya ezibhedlela ezikhulu ngoba imota ebithwala izigulane eMtshabezi ihlezi isifa.
Imbiko yokusilela kwezimota ezithwala abagulayo iza ngesikhathi kulokukhonona emphakathini ngenyathelo likahulumende kaMongameli Emmerson Mnangagwa lokuthengela iziNduna imota.Inengi lithi uhulumende bekumele athenge izimota ezizasiza umphakathi ezifana lama ambulance.
Your browser doesn’t support HTML5
Udaba Silethulelwa nguAlbert Ncube