Umsekeli kaMongameli wecele leMDC elikhokhelwa nguMnu Arthur Mutambara, uMnu Gibson Sibanda kasekho.
USibanda ubhubhe ngoMvulo esibhedlela seMater Dei koBulawayo njalo ubikwa edliwe ngumkhuhlane wemvukuzane.
Ukufa kukaMnu Sibanda kutshiye abemuli yakhe labebandla lakhe bewisa ezimathonsi besithi balahlekelwe kakhulu.
UMnu Sibanda wakhokhela inhlanganiso yeZCTU kusukela ngo 1989 kulandela ukusebenza kwakhe lekaloliwe eyeZimbabwe Amalgamated Railways Union lapho ayengumsekeli kaMongameli kusukela ngo 1985 kusiya ku 1988.
Umuyi ngomunye wabasungula ibandla leMDC ngomnyaka ka1999 esuka enhlananisweni yezisebenzi eye ZCTU. Amalungiselelo okungcwatshwa kwakhe awakaziswa. Abantu basabuthene emzini wakhe eWoodlands koBulawayo.
Ibandla likaSibanda lilobele uMongameli Robert Mugabe incwadi licela ukubana anikezwe inhlonipho yokuba liqhawe lesizwe, iNational Hero.
Umkhokheli walelibandla njalo engumsekeli wenhloko kahulumende uMnu Arthur Mutambara uthi nguye mathupha ohambise isicelo lesi kuMugabe. UMutambara uthe akula kuthandabuza ukuthi uSibanda ubeliqhawe leqiniso.
Umuyi ubikwa eke waba ngumabhalane wenhlelo zokuncedisa uzulu kubandla leZapu eMatabeleland ngeminyaka yabo 1970.
Obona ngokuqhutshwa kwenhlelo eziphathelane lokhetho kuMDC kaMutambara uMnu Paul Themba Nyathi uthi ukubhubha kukaSibanda yikulahlekelwa okukhulu hatshi okwebandla lakhe lemuli kuphela kodwa okweZimbabwe yonke jikelele.
Isiphathamandla seZanu PF njalo engunobhala obona ngenhlelo zabatsha kulelibandla uMnu Absolom Sikhosana uthe bakhala kanye lemuli yako Sibanda lebandla lakhe.
Sixoxe njalo loNkosikazi Lucia Matibenga olilunga leMDC ekhokhelwa nguMnu Morgan Tsvangirai, owasebenza loSibanda kakhulu enhlanganisweni yeZCTU. UNkosikazi Matibenga uthe ibandla lakhe lilusizi kakhulu ngokufa kukaSibanda.