Abebhanga eliphathisa amazwe awezwekazi leAfrica ngemali ele African Development Bank, sebevume ukuxolela eleZimbabwe ukuba lingabhadali isikwelede sezigidi ezedlula kancane amakhulu ayisithupha zamadola-$601 million, ebelilaso kilo.
Lokhu kuvezwe emhlanganweni lentathelizindaba ngoLwesibili ekuseni, owenzelwe emahofisini kamphathintambo wezemali, ngumqondisi we AfDB umnumzana Silbry Tapsoba, osekwethekeleleni kwele Zimbabwe enxuswe nguhulumende ukuzabonisana laye phezu kwendlela angazisebenzisa ukuhlawula izikwelede, ezisaseleyo, enhlanganisweni ezibalisa eye International Monetary Fund, World Bank lezinye.
UDr Tapsoba uthi iqula lamalunga alitshumi lambili lenhlanganiso yakhe eye AfDB lize elizweni lilikhulu kangaka ngoba bekubone kuqakathekile ukuba bezocebisa eleZimbabwe ngokuqakatheka kokuthi liqinise ezokukhulumisana labakwamanye amazwe.
Umphathintambo wezemali, umnumzana Patrick Chinamasa wamukele ngenjabulo lumbiko ethi uhulumende ezimisele ukukugcwalisa lokho okumele kwenziwe yilizwe ukuzihlawula lezo mali abazikoloda ezinye inhlanganiso eziphathisa ngemali yezikwelede umhlaba wonke.
UChinamasa uthi kuzamele isebenze esikhathini esibekiweyo leyo mali ebekwe eceleni ngabe AfDB ukuba isetshenziswe ukuzesula izikwelede zelizwe. Nxa kungasenziwanga lokho kusiyafika uMpalakazi womnyaka ozayo, kuzakutsho ukuba ilizwe liyabe selikhuthile ithuba lokwesulelwa lezo zikwelede.
Leli nyathelo elithethwe ngabe AfDB laba,ukwesula izikwelede zelizwe leZimbabwe, lamukelwe ngenjabulo yizakhamizi zeHarare okubalisa umnumzana Pride Mukono, ingcwethi kwezenhlalakahle kazulu.
Ele Zimbabwe lilezikwelede enhlanganisweni ezimbalwa, zemali eyedlula izigidi eziyisitshigalolunye njalo lisehluleka ukuba lizihlawule kakhulukazi eminyakeni emihlanu edluleyo ngenxa yokungaqhubi kuhle kwelizwe kwezomnotho.
Lezi ngezibalisa enhlanganisweni ye IMF, World Bank kanye lamazwe akumanyano we Paris Club.