Isikhonzi senhlanganiso yomanyano wamazwe womhlaba eye United Nations esibona ngezamalungelo oluntu uNkosikazi Navi Pillay uqalise uhambo lwakhe ngoMvulo ngokuhlangana leziphathamandla zikahulumende ezithile.
UNkosikazi Pillay uhlangane labaphathintambo bakahulumende abagoqela owezemithetho uMnu Patrick Chinamasa loNkosikazi Paurina Mpariwa obona ngezezisebenzi bekhulumisana ngokulondolozwa kwamalungelo oluntu elizweni.
UPillay ufike elizweni ngeSonto ngemva kokunxuswa nguhulumende njalo uzagqiba uhambo lwakhe ngoLwesihlanu.
Kulandela umhlangano wakhe loPillay, uMnu Chinamasa uthe umazise ukuba uhulumende uyawalondoloza amalungelio oluntu njalo imbiko yokuhlukuluzwa kwabantu mahlayana ingamanga.
Uthe lanxa ewahlonipha amalungelo uhulumende, kasoze ananze amalungelo ezitabane njalo bonke abazatholakala besenza into zobutabane bazabotshwa.
Yena uPillay utshele intatheli efika elizweni ukuthi phakathi kohambo lwakhe, kasoze abe eveza ayabe ekukhulumile lalabo ayabe ehlangane labo.
Isikhulumeli sakhe, uRupert Colville uthe uPillay uzahlangana njalo lomkhulu wabahluli uChief Justice Godfrey Chidyausiku.
NgoLwesibili ukhangelelwe ukuhlangana lenhlanganiso ezizimeleyo zisipha ubufakazi ngesimo samalungelo oluntu.
Kodwa ezinye zalezi nhlanganiso ezigoqela iNational Constitutional Assembly, iZimbabwe Lawyers for Human Rights lezinye, zithi azisoze ziphatheke kulumhlangano ngoba uhulumende enxuse inhlanganiso ezisekela iZanu PF ezifana leAffirmative Action Group.
Umgcinisihlalo weNCA kugatsha lwabatsha uMnu Alois Dzvairo uchasise isizatho sabo sokungayi emhlanganweni lo, esithi inhlanganiso ezisekela iZanu PF bezingamelanga zivunyelwe ukubakhona.
Kodwa ingcwethi ecubungula ezombusazwe uMnu Nkululeko Sibanda uthi yinto engela kuhlakanipha ukuthi inhlanganiso lezi zingayi emhlanganweni lo.