Uhulumende uthi isigaba seMatabeleland North yiso esibhekane lendlala enkulu ukwedlula ezinye izigaba zelizwe njalo silabantu abayisilinganiso samatshumi amane lambili ekhulwini, 42 percent, abadinga usizo lokudla oluphuthumayo.
Uthi njalo isigaba seMashonaland West yiso esilabantu abalutshwana abalambayo abalitshumi lambili kuphela ekhulwini, 12 percent. Lokhu kwazise ngabaphathintambo bakahulumende ngoLwesibili ngemva komhlangano wedale lebaphathintambo eleCabinet.
Lanxa uhulumende esithi inani labantu abadinga usizo lokudla elizweni lonke jikelele lilokhe liyizigidi phose ezintathu, 2.7 million, inhlanganiso yeFood and Agriculture Organization ithi inani leli selikhwele laya kuzigidi ezintathi ezilengxenye, 3.5 million.
Inengi emaphandleni likhala ngokuthi umumo wendlala uya isiba mubi ngoba emasimini sokutshile kanti lokudla ezitolo sokudula kakhulu.
Uhulumende uthi useyabele abantu abedlula inkulungwane ezingamakhulu amabili, 247,576, abalambayo ukudla okufika ama-tonne angu-2,722.46.
Isakhamuzi sakombimba, ePlumtree, uMnu Moki Ncube utshele iStudio 7 ukuthi uncedo lolu kumele luhanjiswe kuzo zonke indawo ngoba esigabeni sakhe alukafiki.
Your browser doesn’t support HTML5
Ingxoxo loMnu Moki Ncube