EleBotswana selamukele amajekiseni awokuqala awokulwisana lomkhuhlane, aweCOVID-19 Vaccine, afike ngoLwesibili evela kwele India. EleBotswana lithole amajekiseni azinkulungwane ezingamatshumi amathathu (30,000) azaqala ukuhlatshwa abeBotswana kanye labokuza, abagoqela abeZimbabwe.
Indizamtshina ebithwele umuthi weCovid 19 Covishield Vaccine, ovela kwele India, ifike edolobheni leGaborone ngoLwesibili.
Kube lenjabulo ngokufika komuthi lo, noma nje inani lembhodlela zejekiseni leli liphansi kakhulu, amanye amajekiseni ekhangelelwe ukufika emalangeni alandelayo.
Ukufika komuthi lo, kunikeza ithemba kwabeBotswana, kanye labeZimbabwe bona asebebone inani elinengi labanye babo belahlekelwa ngumphefumulo ngenxa yeCOVID-19.
Umsekeli kamongameli kweleBotswana, umnunzana Slumber Tsogwane uthi leli linyathela lakuqala ekwamukeleni imithi eminengi ezayo eyokulwisana legciwane leCOVID-19.
“Silinde eyinye imithi ukuthi ifike emalangeni azayo. Kuzabe kuyimihlobo yemithi etshiyeneyo. Lokhu yikuqala. Njengoba besitsho, uhambo olude luqala ngonyawo lwakuqala.”
Umuthi we Covishield ufika ngesikhathi eleBotswana lisenzikeni yokulwisana lomkhuhlane weCOVID-19 wona osumemetheke okwamagama.
Uhulumende utshelwe ngamathe ngendlela ingciwane leli elilumathe njengomlilo weganga ngemva kwekhefu lekhisimusi, selibulele abadlula amakhulu amane (413), ngesikhathi esifitshane.
AbeZimbabwe labo basele bebambe owangaphansi ngendlela ingciwane leli elimemetheka ngalo kweleBotswana, selithethe imphefumulo embalwa yabanye babo.
Umnunzana Stanley Ncube esinye sesizalwane seZimbabwe esihlala eGaborone, uthi kuyancomeka ukuthi umuthi weCOVID-19 usuze wafika.
“Samukela indaba ezijabulisayo ukuthi eleBotswana selithole ivaccine. Okuhle yikuthi uhulumende usebikile ngaphambilini ukuthi wonke umuntu uzathola ijekiseni kungakhathelekile ukuthi uphuma kuliphi ilizwe. Into ebuhlungu yikuthi abantu bakithi baphelile, abanye bebhubha behlala bodwa, kucine kubika omakhelwane.”
Uhulumende weBotswana uthi ulinde ezinye indizamitshina ezizafika emalangeni alandelayo ziletha eminye imithi, kungamajekiseni afika inkulungwane ezingamakhulu (100,000) emavikini amabili alandelayo.
IBotswana ibika ukuba izasebenzisa imhlobo etshiyeneyo yamajekiseni eCovid-19, egoqela alungiswa ngabenkampani yePfizer, Johnson and Johnson kanye leAstra Zeneca.
EleBotswana libhekane lesimo seCovid-19 esiqonga okungelamkhawulo, sekutholakale abantu abadlula inkulungwane ezingamatshumi amathathu (32,912), belomkhuhlane lo.
Your browser doesn’t support HTML5
Udaba lwejekiseni yeCovid 19 Vaccine esifike kweleBotswana siluphiwa nguMqondisi Dube