Isibhedlela sekhansili yakoBulawayo, eseThorngrove Infectious Diseases, sithole izipo ezivele kumankampani amathathu akoBulawayo emizameni yokwehlisa obunye bobunzima obubhekane lesibhedlela lesi ngoba yiso esikhangelele ukugcina abantu ababanjwa ligcikwane lomkhuhlane weCOVID-19 lobanje lokhe singakalungisiswa ukuba silungele ukugcina izigulane ziphiwe uncedo zihlala khona.
Abenhlanganiso yeThuthuka Matabeleland Trust, banikeze isipho sokudla, amaMask avela kunkampani eyeBulawayo Babies kunye lokulungisiswa kwemitshina yamandla kagetsi avela elangeni, awesolar, okusuke kunkampani yeChloride Zimbawe.
Usizo oluphiwe isibhedlela seThorngrove Infectious Diseases
UMqondisi weThuthuka Matabeleland Trust , uMnu Wsika Dakamela Ncube uthi bakubone kuqakathekile ukuhlanganela labanye ekuncediseni umango abasebenzela kuwo.
''Siphe isipho esibhedlela seThorngrove impuphu, ilambazi, amatemba, irice lamabhisikiti ukuze labo abazagcinwa lapha belomkhuhlane kumbe bezohlolwa igcikwane lecorona bathole ukudla kubize ikhulu elilamadola emali yeMelika''
UKhansila kaWard 7 uNkosazana Sikhululekile Moyo umgcinisihlalo weFuture Water Action Committe uveze ukubonga kwakhe ngesipho abasithole lamhlanje.
''Izipho esizithole lapha esibhedlela seThorngrove okwezigulane zeCovid 19 siyakubonga kutshengisa uthando esibhedlela sabo ngoba izigulane ezizalaliswa kule indawo sezilokuhdla.''
Kusenjalo, uMqondisi wezempilakahle kukhansili yedolobho lakoBulawayo uDokotela Khulamuzi Nyathi uchasisa kabanzi ukusebenza abakwenzayo lokhu leligcikwane leCOVID 19 liqale ukuba yingozi.
''Okwamanje silezisebnzi ezingamatshumi ayisithupha ekhulwini ezempilakahle njalo sesiqalile ukuqhatsha ukuze sizame ukugcwalisa izikhala ezikhona ngoba sesibhekane lomkhuhlane wengculaza. Kulandela ukwehla kwenani labantu asebesiya ezibhedlela ezinkulu, amakilinika ethu asephume lendlela ezithile zokusiza inengi labantu labo abakade bezonatha kumbe bethatha amaphilisi sesibapha amaphilisi amalanga ambalwa ukuze sibelenani eliphansi eliza esibhedlela. KUlabo abazithweleyo besithi baze okwenyanga eziyisificaminwe mibili sesiyehlisile umuntu usebuya kanye aphenduke lapho engezwa ephathekile. Sesikhuthaza izigulane zethu ukuba batshaye ucingo uma bephathekile, uma sisenelisa silakho ukubalanda emakhaya, le yimizamo yokwehlisa inani eliza emakilinika kanye lokuthelelana umkhuhlane weCOVID-19.''
Isibhedlela seThorngrove Hospital Isolation Ward silakho ukugcina izigulane ezilitshumi lasikhombisa abantu bengaminyananga, kodwa bengaminyana senelisa abamatshumi amathathu.
Indawo ekhangelelwe ukugcina izigulane lokwamukela labo abahlolwa igcikwane eleCoronavirus eseliqede abantu emhlabeni jikelele, esibhedlela lesi, kayila mitshina lemphahla engasetshenziswa yizisebenzi zempilakahle ukuzivikela ekuthelelweni leli gcikwane.
Okwamanje, inhlanganiso yezempilakahle emhlabeni jikelele eyeWorld Health Organisation ithi akukabi lomuthi wokwelapha iCOVID-19, abantu bamele baqakathekise ukulondoloza ukuhlanzeka lokuzivikela.