Isibhedlela seMpilo Central Hospital sitholiswe usizo lwempahla zokugqoka bezivikela ekubambeni igcikwane leCovid-19 kunye lokuthi bagejelwe umgodi wamanzi yinkampani yencingo eyeTelone leNetone.
Isiphathamandla seMpilo Central Hospital, uDokotela Solwayo Ngwenya uthi bamkele ngenjabulo usizo lwezembatho zokuzivikela abazitholiswe yiTelone/Netone.
AbeMpilo Hospital betholiswa usizo ngabeNetone labe Telone
“Sithabe kakhulu ngokutholiswa isipho yiNetone leTelone esezembatho zokuvikela ukubamba umkhuhlane weCovid-19 ngesikhathi siselapha abantu abaleCorona virus. Sithabe kakhulu ngoba yizembatho ezilohlonzi njalo zizasinceda zisivikele ukubamba lumkhuhlane. Siyabonga kakhulu silethemba ukuba abanye bazabona ukuba abantu bahlalisana njali labanye.
UNkosikazi Elma Dube umqondisi weNetone koBulawayo uchaza isipho abasiphe isibhedlela seMpilo.
“Sikubone kubalulekile ukuba siphe isipho semphahla yokuvikela iCovid-19 kuzisebenzi zeMpilo kuhlanganisa lokugebha umgodi wamanzi ngoba idolobho libhekane lodubo lamwanzi. Isipho sethu ezweni sizafika i$10 million dollars sisazokupha lezinye izibhedlela ezweni.’’
AbeMpilo Hospital betholiswa usizo ngabeNetone labe Telone
UMqondisi weTelone ezansi yelizwe uMnu Wing Sibanda uthi kuqakathekile ukuncedisana lohulumende empini yokulwisana leCovid-19.
“Sikubone kubalulekile ukuba sincedisane lohulumende sitholise izisebenzi zonke zempilakahle ezweni ngempahla yonke edingakalayo ekuvikeleni ukubamba umkhuhlane weCovid-19 ngesikhathi lesi esibhekane laso kuhlanganisa lokugebha imigodi yamanzi ukuze sisize umphakathi,”
Amankampani ambalwa, inhlanganiso ezizimeleyo lozulu sebethe baphuma ijumo ezweni behamba betholisa izibhedlela impahla zokuvikela ukuthelelweni umkhuhlane weCovid-19 ekusebenzelaneni lohulumende emizameni yakhe yokumelana lokumemetheka komkhuhlane lo osuthethe imiphefumulo yabantu abanengi emhlabeni jikelele njalo kungakatholakali umuthi wokuwelapha.