Iqembu leSenegal linqobe eleGambia 3-0 emdlalweni weAfrica Nations Cup odlalelwe kwele Ivory Coast ngoMvulo.
Komunye umdlalo odlalwe ngoMvulo eleCameroon libengutshiki lobhanqa 1-1 lele Guinea.
NgoLwesibili amehlo wonke akhangele amaqembu eningizimu yeAfrica lapho iBafana Bafana yakwele South Africa ezadibana leqembu leMali kumdlalo wabo wakuqala kuthi iNamibia Brave Warriors ingqikilana leTunisia.
Izolo kubelezimanga kul’imdlalo ngoba amaqembu amakhulu kwezemguqu abekhangelelwe ukunqoba kalula eleEgypt, Nigeria leGhana ehlulekile ukunqoba emdlalweni yawo yakuqala. EleNigeria lenze 1-1 lele Equatorial Guinea, eleEgypt lihlohlelwe nguMohammed Sala ngombekwa umdlalo usufika emaphethelwani kwaba yaba yi2-2 leMozambique kukanti Black Stars yakwele Ghana ilahlwe phansi ngele Cape Verde 2-1.
Bekhuluma ngemidlalo le lelandelayo abanengi bathi iBafana Bafana izenza izimanga kusasa. UWalter Mpofu uthi iqembu leMzansi liqine saka.
“ISquad lesi asitshuzikeyo ngibona engani sizahamba kuma knockout stages. Udlalose abafana abancane kakhulu umiksile le experience nyana. Since kuma qualifiers bebe performer kahle kakhulu. Umuntu engithembe ukuthi aphefome kahle nguZwane lo Percy Tau.”
UChris Zulu uvumelana loMpofu esithi lizadlala ngamandla iqembu leBafana Bafana.
“Ngibona engathi iBafana Bafana ingenza kahle kugame yayo sithi leyokuqala nje namhlanje izoyidlala kusasa le Mali. Sibonile izolo abantu bedliwa izimali bethi iGhana iyawina kodwa yadliwa kabuhlungu.”
UMunyardzi Mombe ohlala eNketa koBulawayo uthi uhamba leNigeria.
“Ngikhangele iAFCON le edlalwayo iproblem yikuthi ilizwe lami alikho phakathi kwe AFCON. Kungasenani sengizisapotela iNIGERIA but unfortunate amateam amakhulu ayadliwa angazi kumbe izawina i Nigeria kumbe izathatha itrophy, so ngizabe ngiyikhangele ngiyisapota lami iNigeria.”
UMelokuhle Gasela yena uthi ukunqotshwa kweqembu leGhana, lokulahla imklomele eyenziwe ngele Gipite lele Nigeria kwenziwa yikudelela kwamazwe amakhulu kwezenguqu.
“Ukulahla kwazo ama points ngokubona kwami kutshukuthi ngokubona kwami ngibanangathi zisuke zadekela la ama team ngesizatho sokuthi bona bazibona belezinga eliphezulu lama players adlala phesheya emanengi basezitshela basebeyeyisa ke lawa ama team lawa amancane ukuthi wona alaplayers amanengi kakhulu adlala phesheya.”
Abanye badliwe imali eyesabekayo akade bebhejele eleGibhite. UZiphozenkosi Samba ohlala EMgawnwini ukhala ezimathonsi.
“Ngixwayise lalaba ababhethayo izolo mina ngifakeke i Egypt ukuthi win le Ghana ukuthi win, namhlanje sengidliwe imali engangabo 200 US. So next time linanzelele bantu ababhethayo libhethe kahle, libhethe ngonanzelelo lingadeleli. Lingabhethi la amateam amakhulu lifake wonala ama team amancane , ungaze ubone iteam ilemali enengi ifakele kunjalo.”
Umqondisi wokuthuthukisa ezenguqu eMatabeleland uBrian Moyo upha imibono yakhe ngemdlalo yeAfcon encoma eMozambique.
“Badlale kuhle kakhulu, sifisa ukuthi bangalahli ithemba. Siyayithakazelela imdlalo ye AFCON siyayilandelela siyayibukela. EAfrica akula team ngingathi kumbe emdlalweni webhola jikelele, hayi kuyangokuthi uzilungiselele okungakanani. Nxa lizilungiselele kuhle labadlali abatshengisela umfutho, hayi liyathola imklomelo. Akula zakuthi sidlala labo Ghana sidlala labo iEgypt.”