Iqula likaMongameli Jacob Zuma wele South Africa, elisuke eZimbabwe ngoLwesithathu ngemva kokukhulumisana lamabandla akuhulumende womanyano ngokuhluphayo phakathi kwawo lithi liyasuthiseka ngenkulumo ezikhona lanxa nje abakuzo besithi akula lutho oluphumelelayo.
Iqula likaMongameli Zuma leli lifike eHarare ngoMvulo lakhulumisana kabanzi labamela ibandla leZanu PF kanye labamela amacele womabili eMDC kunkulumo zokuzama ukulungisisa okusele kulenga kusivumelwano seGlobal Political Agreement.
Abamela ibandla likaMongameli Mugabe kunkulumo lezi, eleZanu PF babikwa betshele iqula lika Zuma kanye labosowabo beMDC kunkulumo ukuthi ibandla labo lifuna kwesulwe izijeziso ezethulelwa iziphathamandla zalo kuqala lingakalungisisi izikhalazo zeMDC.
Omunye wabacebisi bakaMongameli Zuma njalo ekuqula ebeliseZimbabwe, uNkosazana Lindiwe Zulu utshele uNtungamili Nkomo ukuthi bayajabula ngenkulumo lezi lanxa nje befuna ziphethwe ngokuphangisa ngoba sezidonse kakhulu.
UNtungamili Nkomo oweStudio 7 uphinde wakhuluma lengcwethi ecubungula ezombusazwe uMnumzana Zenzo Nkomo othi iqula likaZuma lilakho ukulungisisa ingxabano ekhona phakathi kweZanu PF leMDC lanxa nje abakunkulumo besithi ukudonselana phakathi kwabo kuyaqhubeka.