Iqula elikhethwe ngumlamulankunzi kudaba lweZimbabwe liphendukile eHarare ngoMvulo emizameni yokufuqha amabandla akuhulumende womanyano ukuthi alungisise okuhluphayo phakathi kwawo ngokuphangisa.
Iqula likaMongameli Jacob Zuma weSouth Africa, yena okhethwe yiSadc Troika ukuthi akhokhele imizamo yokulungisisa okuhluphayo kuhulumende womanyano eZimbabwe, libikwa likhulumisane loMongameli Robert Mugabe, inhloko kahulumende uMnu Morgan Tsvangirai kanye lomsekeli wakhe uMnu Arthur Mutambara.
Iqula leli libikwa likhulumisane njalo labamela iZanu PF leMDC kunkulumo libuzisisa ukuthi yikuphi asebevumelene phezu kwakho lokuthi yikuphi okulokhu kusahlupha.
Umcebisi kaZuma, uMnu Charles nqakula nguye okhokhela iqula leli, lona ebelise Zimbabwe ngeviki edluleyo emizameni yokukhuthaza ukuvumelana phakathi kwamacele womabili eMDC leZanu PF entweni ezitshiyeneyo ezilokhu zihlupha kuhulumende wobumbano.
Abameli bamabandla kulezi nkulumo babikwa sebevumelene entweni ezinengi, kodwa babikwa belokhu bedonselana phezu kodaba lukaMnu Roy Bennett, uMnu Gideon Gono loMnu Johannes Tomana.
Iqula lika Zuma lizabuthanisa ubufakazi phezu kokuthi kuyini osokuvunyelwene lokuthi kuyini okulokhu kuhlupha njalo emveni kwalokho lizaloba ugwalo uMnu Zuma ozahamba lalo kuSadc troika.
Imbiko esiyamukeleyo iveza ukuthi uhulumende womanyano ulakho ukwazisa uzulu ngezinto asevumelene phezu kwazo kuyonale iviki. Umphathintambo obona ngokwenzakala ewofisini kaTsvangirai uMnu Gorden Moyo uveze ukuthi inkulumo ziqhubeka kakuhle.
Ingcwethi ecubungula ezombusazwe uMnu George Mkhwanazi, utshele uNtungamili Nkomo weStudio 7 ukuthi ukuphitsheka kuka Zuma kuveza sobala ukuthi ufuna udaba lweZimbabwe lulungisiswe ngokuphangisa.
Kunjalo nje, uzulu weZimbabwe uthi ukhangelele ukuthi inkulumo lezi ziqedwe ngokuphangisa amabandla kuhulumende womanyano evumelane entweni zonke ezihluphayo.
UNkosikazi Nhlanhla Sikhunyana, owako Mangubo emangweni wePlumtree uthi kunengi osekuguqukile ngemva kokubunjwa kukahulumende womanyano, esithi ukhangelele ukuthi uhulumende lo uqhubeke ukhona kuze kuqhutshwe ukhetho olutsha.
Omunye njalo esikhulume laye nguMnu Nduna Mayezi, yena otshele uBrenda Moyo weStudio 7 ukuthi kumele amacele womabili eMDC ekhulume ngazwi linye kunkulumo lezi ukuze kulungisiswe okuhluphayo.