Iqula elithunywe nguMongameli Jacob Zuma kweleZimbabwe ukuyakhuthaza amabandla akuhulumende womanyano ukuthi alungisise okuhluphayo phakathi kwawo, liphindele eSouth Africa ngolweSibili lidanile ngokudonselana okukhona phakathi kwamabandla la.
Iqula leli lifike eHarare ngeSonto, kwathi ngoMvulo lakhulumisana loMongameli Rober Mugabe labakhokheli bamacele womabili eMDC abathi uMnumzana Morgan Tsvangirai kanye loMnumzana Arthur Mutambara.
Abazi ngokwenzakalayo bathi iqula leli liveze ukudana okukhulu ngoba lithole amabandla la sekhulumisana phezu kwezinto ezinenginengi wona ebevumelene eMozambique ngenyanga edluleyo ukuthi azakhulumisana phezu kwezinto eziyithoba minwe mibili kuphela ezihluphayo.
Okuhluphayo kakhulu kunkulumo lezi kubikwa kuludaba lwezijeziso (ama sanctions), imisakazo esakaza ingaphandle kwelizwe kanye lodaba lukaMnumzana Gideon Gono usibalukhulu webhanga elikhulu lelizwe ele Reserve Bank of Zimbabwe kanye loMnumzana Johannes Tomana igqwetha elikhulu likahulumende.
Omunye obekuqula lika Zuma uNkosazana Lindiwe Zulu utshele umsakzo lo ukuthi bazakwazisa uZuma ngabakufumeneyo kuhambo lwabo, yena osezabona ukuthi athathe manyathelo bani.
UMongameli Zuma ngokwakhe ubikwa elakho ukuya eZimbabwe ngeviki ezayo nxa kuyabe kulokhu kungakabi lokuvumelana phakathi kweMDC leZanu PF entweni ezitshiyeneyo.
Ingcwethi ecubungula ezombusazwe uMnumzana Samukele Hadebe utshele uNtungamili Nkomo weStudio 7 ukuthi ukudonselana okuqhubekayo phakathi kwamabandla la kuveza sobala ukuthi aqakathekisa izikhundla ukwedlula uzulu weZimbabwe.
Kunjalo nje, inhloko kahulumende uMnu Tsvangirai ukhuthaze amabandla akuhulumende ukuthi asebenzelane ndawonye kuvuselelwe ilizwe. uTsvangirai ubekhuluma esedale lephalamende.
