Iqula leMelika elifike kweleZimbabwe ngoLwesithathu lilanda ukuyahlaziya indlela uhulumende womanyano asebenza ngayo, lihlangane loMongameli Mugabe lamabeli beMDC ngolweSine.
UMnu Gregory Meeks, okhokhela iqula leli utshele intathelizindaba ukuthi ilizwe lakhe lizimisele ukuvuselela ubudlelwano balo leZimbabwe bona obutshabalale eminyakeni edluleyo ngenxa yombuso omubi weZanu PF.
Umphathintambo wezemali uMnu Tendai Biti, ongunobhala jikelele njalo wecele leMDC elikhokhelwa nguMnu Morgan Tsvangirai ngomunye wabahlangane lequla leMelika leli.
Ekhuluma lentathelizindaba, uBiti ukhuthaze iMelika ukuthi iguqule umthetho ovimba amabhizimusi elizwe layo oweZimbabwe Democracy and Economic Recovery Act ukuthi esebenzelane lamankampani athize eZimbabwe.
U Biti ukhuthaze njalo uMongameli Jacob Zuma, ongumlamulankunzi kudaba lweZimbabwe ukuthi angenele kulungisiswe ukudonselana okukhona phakathi kweZanu PF leMDC phezu kokugcwaliswa kwesivumelwano seGPA ngoba inkulumo phakathi kwamabandla la sezehlule.
Ingcwethi ecubungula ezombusazwe uMnu Mlamuli Nkomo utshele uNtungamili Nkomo weStudio 7 ukuthi uhambo lwequla leMelika lolu, luqakathekile ngoba amazwe womabili emele avuselele ubudlelwano phakathi kwawo.