Abalandeli bomdlalo wenguqu sebelinde ngamehlo abomvu ukuqhubeka komncintiswano weAfrica Cup of Nations oqhutshelwa elizweni leIvory Coast ongena esigabeni esequarter–final kusasa. Kubika uJoseph Njanji.
Kulemidlalo emibili eyesigaba lesi lapho iqembu leNigeria elizadibana leleAngola ngehola lesikhombisa ntambama kuthi eleDemocratic Republic of Congo lizangqikilana leleGuinea ngehola letshumi ebusuku.
Umlandeli womdlalo wenguqu uDexter Ndlovu uthi ukhangelele ukuba limidlalo iqhubeke isiba lempumela eyabe ingakhangelelwanga ngabanengi..
“Njengoba sonke sesibonile nje ukuba imidlalo leyi ilempumela etshiya abantu bekhamise imilomo, sekungenzeka abantu abanengi basekele iqembu leNigeria kodwa besale bemangele. Ungakhangela indlela iqembu leAngola elidlale ngayo abanengi bebeyikhangelela phansi kodwa nansi ilokhu ikhona njalo ngikhangelele ukuba izanqoba iqembu leNigeria. Yebo siyakwazi u(Victor) Osimhen uzahlohla kodwa okusalayo lizadliwa iqembu leNigeria.”
UGladstone Moyo othakazelela imidlalo le uthi iqembu leDemocratic Republic of Congo lizaqhubekela phambili lilokhu lisebenzisa imbekwa ukufinyelela kusigaba esilandelayo esomncintiswano njengalokhu elikwenze kusigaba esedluleyo.
“IDemocratic Republic of Congo leGuinea zizakuyatshaya imbekwa ngoba iqembu leDRC liyavikela kakhulu isango layo kuthi eleDRC kube yilo elinqobayo. Kuzakuthi phakathi kweNigeria leAngola eleNigeria lizanqoba ngoba loba lilabagadli abalohlonzi kakhulu.”
Intathelizindaba yezemidlalo uPraise Dlakama laye uvumelana loMoyo ukuba iqembu leDRC leleGuinea azayehlukaniswa yimbekwa.
“IDemocratic Republic of Congo iyehluleka ukunqoba kodwa ifinyelele kusigaba se quarter – final. Kuzakuba nzima emdlalweni wayo leGuinea ngoba iGuinea layo emuva iqinile, bayavala. Lokhu kutsho ukuba lumdlalo ungafika kumbekwa njalo eleDRC njengoba selivele like lanqoba ngembekwa, selingenelisa njalo ukuba lidlulele phambili.”
Oke wadlala ibhola elizweni leSouth Africa uPrince Lungani Siwela uthi lakumdlalo wakuqala phakathi kweNigeria leAngola kuzakuba nzima ukuba kutholakale impumela kungakangezelelwa isikhathi.
“Nxa ngikhangela imbali yalawa maqembu langendlela adlale ngayo emidlalweni eyedluleyo ngibona angani zizakwala zilokhu zingutshiki lobhanqa kuze kucine kungezelelwe isikhathi kuthi eleNigeria libe selinqoba ke ngemva kwalokho. Iqembu leNigeria senginanzelele ukuba bayakhuphula umfutho nxa umdlalo uqhubeka okokuthi kuba lomehluko omkhulu ekudlaleni kwabo kuhlandla lakuqala lakuhlandla lesibili elomdlalo yikho lizaphumelela sekufakwe esinye isikhathi.”
Odlalela iqembu leChicken Inn elidlala kusigaba seSouthern Region Division One uZibusiso Sibanda uthi sekungenzeka loba yini kusigaba sequarter–final njengalokhu okwenzakale kumidlalo eyedluleyo eyomncintiswano.
“Imidlalo yeAfcon leyi ungathi ngeyamaqembu abengakhangelelwanga ngabanengi ukuthi angenza kuhle okokuthi iqembu leNigeria lingabhayiza lingethuka sebelitshaye ezinengi ngoba abagadli beAngola bayahlohla kakhulu. INigeria iqinile emuva kodwa ithwala nzima ukuhlohla.”
Eminye imidlalo yesigaba sequarter–final izakuba khona ngoMgqibelo lapho iqembu leMali elizadlala khona leleIvory Coast ngehola lesikhombisa ntambama kuthi eleCape Verde lingqikilane leleSouth Africa ngehola letshumi ebusuku.
SEE ALSO:
Udaba Esilwethulelwe nguJoseph Njanji