Umqeqetshi weqembu elimela ilizwe emdlalweni wenguqu, elama Warriors, uKalisto Pasuwa uthi iqembu lakhe selilungele ukudibana leqembu elimela ilizwe le Lesotho emdlalweni wehlandla lakuqala kumncintiswano we African Nations Championships.
Iqembu le Zimbabwe lizangqikilana lele Lesotho ngeSonto enkundleni ye Barbourfields emdlalweni wokudinga amaqembu azakuyaphatheka kumidlalo ye African Nations Championships eyaziwa ngcono ngegama lokuthi Chan yona ezaqhutshelwa elizweni le Rwanda ngomnyaka ozayo.
Lumncintiswano ungenwa ngabadlali abadlala besekhaya kuphela njalo iqembu le Zimbabwe lilembali enhle kuwo njengoba liphatheke kuyo yonke imidlalo esibekhona kusukela limidlalo yasungulwayo ngomnyaka ka 2010.
Ekhuluma lentathelizindaba zemidlalo namhla ekuseni umqeqetshi weqembu le Zimbabwe uKalisto Pasuwa uthe abadlali bakhe sebehlome
baphelela.
Iqembu le Zimbabwe ligcwele abadlali abasakhulayo abagoqela abagadli abayibo abakhokhelayo lonyaka ngokuhlohla kusigaba se PSL abathi
uKnox Mutizwa kanye lo Edmore Chirambadare.
Bobabili laba sebehlohle amagoli alitshumi lanye umdlali ngamunye.
Inengi labadlali beqembu le Zimbabwe bebeyingxenye yeqembu labaleminyaka engamatshumi amabili lantathu eliphatheke kumidlalo ye All Africa Games ngenyanga edluleyo njalo omunye walabo yimvimbi uLawrence Mhlanga othi yena kuzamele bahlohle amagoli amanengi ukuze umthwalo ube lula nxa sebesiyadlala kwele Lesotho kumaviki alandelayo.
Kusigaba esedlulayo iqembu le Zimbabwe linqobe ele Comoros kuthi ele Lesotho litshaye ele Botswana.
Kolunye udaba olumayelana lomdlalo wenguqu iqembu labesifazane elimela ilizwe lizadibana lelimela ilizwe le Cameroon ngeSonto enkundleni ye Rufaro njalo iqembu elizanqoba lapho lizakuyadlala kumidlalo yama Olympics ezaqhutshelwa elizweni le Brazil ngomnyaka ozayo.
Iqembu le Cameroon linqobe nge 2 ka 1 kuhlandla lakuqala lomdlalo kumaviki amabili edluleyo okutsho ukuba iqembu le Zimbabwe kumele
lihlohle kanye kungela mpendulo ukuze lidlulele phambili.
Sikhangele umdlalo kakhilikithi; Iqembu elimela ilizwe le Zimbabwe linqobe ele Afghanistan ngama wickets ayithoba minwembili emdlalweni wakuqala owohlobo lwe One Day International obusenkundleni ye Queens Sports Club namhla.
Iqembu le Afghanistan yilo eliqale ukutshaya ibhola lathola amaruns alikhulu lamatshumi amabili lambili (122) lilahlekelwe ngabadlali bonke kuma overs angamatshumi amahlanu.
Kuthe iqembu le Zimbabwe seliphendula labuthelela ama runs alikhulu lamatshumi amabili lesithupha (126) kuma overs afika phose
amatshumi amabili lane (23,2).
Umdlalo wesibili phakathi kwalamaqembu ukhona ngeSonto kuthi eminye emithathu eyohlobo lwe ODI izadlalwa ngeviki ezayo khona njalo
enkundleni ye Queens Sports Club ko Bulawayo.
Your browser doesn’t support HTML5
Udaba Silwethulelwa nguJoseph Njanji