Iqembu lesibili lezizalwane zeZimbabwe eziyisikhombisa eziphindiselwe ekhaya ngemva kokuxotshwa kweleBhilitani zifike elizweni Ngolwesine.
Abantu laba bafike esilindweni sendizamtshina ese Robert Gabriel Mugabe International, eHarare, ngendizamtshina, yohlobo lwe Boeing 767.
Bebethwele impahla ezinlutshwane njalo bengafuni ukukhuluma le ntathelizindaba kuthi omunye wabo utshele intatheli ukuba kabasoze bakhulume le ntatheli.
Ngemva kokufika kwabo bathethwe basiwa endaweni ye ZIPAM, eseDarwendale, lapho abazagcinwa khona okwensuku ezilitshumi kulandelwa iziqondiso zikahulumende zokubona ukuthi abantu abavela phandle kwelizwe baleCovid-19, loba hatshi.
Ekhuluma lo msakazo we ZBC umholi weziphepheli kugatsha lukahulumende lwezemsibenzi, uMnu Totamirepi Tirivavi uthe uhulumende ucela abantu ukuba bakhangele izihlobo zabo e ZIPAM.
Kunyanga ephelileyo ngemva kokuphendukiswa kwabanye abaxotshwa kwele Bhithani uhulumende we Zimbabwe uthi lokhu kuveza ukuba ubudlelwano phakathi kwakhe lamanye amazwe womhlaba sebusiba ngcono.
Kodwa ingcitshi kwezombusazwe uMnu Bekezela Gumbo uthe lokhu kubangelwa yi Covid-19 ngoba amazwe engasafuni abantu abanengi ikakhulu ezephulamthetho.
“Nxa uhulumende we Zimbabwe eletha abantu laba, lokhu kubangelwa yi Covid-19. Ohulumende abanengi abasenelisi ukugcina abantu ngenxa ye Covid-19”
Uqhubeke esithi ele Zimbabwe kalikenzi okunengi ukuthi abantu balo bengakholisi ukuhlala kwamanye amazwe.
“Ubudelwano singathi buyalunga nxa kungela dubo olunjenge Covid-19, kodwa isikhathi esikiso kasitshengise ukuba sekulokuphucuka bobudlelwano be Zimbabwe le Bhilithani”
Esinye isakhamuzi se Harare uMnu Gibson Nyikadzino uthi kumele uzulu amukele abantu abavela kwamanye amazwe.
“Abantu laba kumele bamukelwe ngoba besebehlale isikhathi eside bengekho kuleli. Kumele abantu bezame ukwenza okuhle njengababntu lokugcina indawo zethu ebantwini laba”
Imizamo yokuthola umbono ka hulumende ngaloludaba yehlule.
Ukuza kweziphepheli lezi kutsho ukuba sekulabantu abangamatshumi amabili lanye ngemva kokuza kweqembu lakuqala vevela eBhilithani kunyanga edluleyo.
Uhululumende we Bhilithani useveze ukuba kuzaphendukisa izizalwane ze Zimbabwe ezikhitshwa emajele ngemva kokubotshelwa amacala ehlukeneyo.