Kuhlandla leWoza Friday lamhlanje uBenedict Nhlapho uza lembali yeqembu lembube elaBanqobi Bomhlaba elabunjwa ngumuyi uBongani Nxumalo lo Elijah Mbambo okhalelayo kuleli qembu.
U Elijah uthi bekungumnyaka ka 1995 eNkulumane koBulawayo ngesikhathi yena lomuyi Nxumalo bebumba leli qembu.
“Bekungalulanga ukuhlanganisanje konke kuze kutholakale ama unifomu kutholakale ama members. Usebenze kakhulu ukuthi sithole amamembers acule laBanqobi,” kutsho uMbambo.
Uthi lavela lathi liqala ukucathula selibabhuqa osowabo kungadlalwa.
Uthi umuyi yena wayewenza ngobuciko umsebenzi wakhe wokukhokhela inhlelo zonke zaleli qembu kanti emlonyeni lasenyaweni lakho wayephiwe.
Kutsho uMbambo: “Obefika khona bekungenanto aphuma engelayo. Bengimthembe kakhulu nxa sekufika ekuqoqeni lokukhuluma labantu. Lobuntunje ebantwini ma efikanje eqala nje ingxoxo yakhe isiyaphutsha uyazi ukuthi ukhuluma lendoda eqondayo umsebenzi wayo. I administration ubeyazi kakhulu.”
Obesima duze loNxumalo nxa sekuculwa uMandla Mbambo uthi uzahlala emkhumbula.
UMbambo uthi: “Ikhona ingoma enjalo esengiyibhalile engikhumbuza yena ngoba ubesima la eceleni kwazi, besilokhu siqwebana njalo ma sicula engibonisa nxa kukhona okungamaphutshana engikwenzayo.”
Ngo 2000 leli qembu lakhithiza idlalade elithi Uhambo lwaBanqobi, kweza uLimpopo crossing ngo2008 yena owelanywa ngu Isivumelwano ngo 2011.
Intatheli yeZimbabwe uMxolisi Ncube uthi uNxumalo wayephiwe inqwaba yamathalenta.
“Ubengumanager ka sisiTho, ubeke wamaneja futhi iNdolwane before, ngazombona futhi esemaneja uCharlie, ngazombona futhi esemaneja umfana kaSkuza uDelani. Sike sambona futhi e actor lapha kuSibaya. Ubengumuntu ulamathalenta amanengi ahlukeneyo,” kutsho uNcube.
Kantike lakwezamasiko umnumnzana Brian Ndwane uthi wabadonsa waze wayabatshiya emzini wenkosi yamaZulu UGoodwill Zwelithini.
“Wasebenza ngokuzimisela kakhulu uNxumalo, elothando, elokubekezela. Ebanwini esengisebenze nabo, kangicabangi ukuthi ukhona ozofana loNxumalo ngoba ibiyindoda elokubekezela ethanda kakhulu iqiniso,” kutsho uNdwane.
Leliqembuke lona lithi loba lisemalilweni liyambonga uMvelingqangi ngempilo kaNxumalo.
UElijah ke yena owandizela phetsheya kolwandle esiyacula emazweni leqembu leSunduza engakabumbi leli qembu uthi ngeke inkamba ivalwe ngokufa kweJoni ngakho bazaqhubeka begcwalisa isifiso sikaNxumalo sokuthi iqembu laBanqobi laziwe umhlaba wonke.
Isifiso sethu yikuthi Abanqobi Bomhlaba beqhubekle phambili uNkulunkulu aze abuye yiso isifiso sethu.
AbaNqobi bomhlaba bathi kubazwisa ubuhlungu ukuphelela emazweni, besithi mhlawumbe aluba bebesekhaya mhlawumbe uNxumalo ngabe usaphila njalo ngabe basacula naye.
Your browser doesn’t support HTML5
Udaba Silethulelwa nguBennedict Nhlapho