Inhlanganiso elawula ukudlala kwamaqembu enguqu okwezinga laphezulu eye Premier Soccer League isiyethule uluhlu oluveza ukuba amaqembu la, azadlala njani ngeviki yakuqala eyomncintiswano we Castle Lager Premier Soccer League
Imidlalo yenguqu eyesigaba saphezulu ese Castle Lager Premier Soccer League ihlelwe ukuba iqale ngoLwesihlanu mhla zinhlanu kuyonale inyanga kaLwezi.
Abaqali besiziba ngamaqembu athi ele Harare City kanye lele Herentals wona adibane enkundleni yeNational Sports Stadium, eHarare NgoLwesihlanu. Iqembu ele Harare City linqotshwe 1 kazero ngeleHerentals kulumdlalo.
Umqeqetshi weqembu le Harare City uLloyd Chitembwe uthi sebekulungele ukuqala kwemidlalo yeligi ngemva kokuphatheka kwabo kumidlalo yenkezo ye Chibuku Super Cup.
“Okuhle yikuba sithole ithuba lokuba siyakhe amaqembu ethu njalo bekulithuba elokuba silungiselele ukuqala kwemidlalo yeligi. Kusiphathise kakhulu njengeqembu,” kutsho uChitembwe.
Eminye imidlalo ehlelwe ukuba idlalwe ngeviki lakuqala elomncintiswano we Castle Premier Soccer League izadlalwa ngokulandelayo.
NgoMgqibelo kuqoqwe ukuba kuzakuba lemidlalo emihlanu njalo le ngebalisa ozakuba phakathi kwe FC Platinum le Tenax enkundleni yeMandava, iqembu le ZPC Kariba lizemukela ele Caps United enkundleni yeNyamhunga, iqembu le Chicken Inn lizadibana lele Cranborne Bullets ngase Luveve, iqembu le Black Rhinos lizangqikilana lele Highlanders enkundleni yeNational Sports Stadium kuthi ele Ngezi Platinum Stars lizadlala lele Bulawayo City ngase Baobab.
NgeSonto kulemidlalo emithathu ehlelwe ukuba idlalwe njalo igoqela ozakuba phakathi kweqembu le Dynamos kanye lele Yadah ozaqhutshelwa enkundleni ye National Sports Stadium, iqembu le Bulawayo Chiefs lizavakatshelwa ngele Triangle ngase Luveve kuthi iqembu le Manica Diamonds lizadlala lele Whawha enkundleni ye Sakubva.
Imidlalo yeligi kwele Zimbabwe ibicine ukudlalwa ngomnyaka ka 2019 lapho iqembu le FC Platinum okuyilo eliphakamise isicoco.
Nyakenye akwenelisekanga ukuba kudlalwe ngenxa yobhubhane lwe Covid – 19.
Kusenjalo inhlanganiso ebona ngokuqhutshwa komdlalo wenguqu elizweni eye Zimbabwe Football Association namhla ikhuphe umbiko isazisa ukuba yiziphi inkundla ezizasetshenziswa ngamaqembu adlala kusigaba saphezulu ese Premier Soccer League.
Lezinkundla ngezibalisa eye Barbourfields, eye Luveve, eye Gibbo, eye Baobab, eye Nyamhunga, eye Ascot, eye Sakubva, eye Mandava kanye lele National Sports Stadium.