Ibandla le Progressive Democrats of Zimbabwe elikhokhelwa nguNkosazana Barbara Nyagomo lithi lizimisele ukusebenza lamanye amabandla ukwenzela ukulungisa konke okuhluphayo eZimbabwe.
Umsekeli kamongameli webandla leli uMnu. Norris Moyo, uthi amabandla alwisana lebandla leZanu PF kumele athathe isinqumo esifanayo sokuthi kukhitshwe ibandla leli embusweni ukuze kulungiswe umnotho osubhidlika lokunye okungahambi kahle elizweni.
UMoyo uthe, “Thina njengePDZ sifuna ukusebenza lebandla elilombono onjengowethu. Ukuze kulunge eZimbabwe kumele siqale sisuse leyombangela eyenze ukuthi kuhlephe eZimbabwe. Ukulungisa okwenzakala eZimbabwe yikuthi sikhiphe ibandla leZanu PF loMongameli Robert Mugabe.”
Uphinde wathi okwenza ukuthi amabandla aphikisayo abemaqamugamu yikuthi abantu abanengi elizweni bafuna izikhundla.
Uthe ibandla lakhe yilo elimele uzulu yikho-nje besebenza emakhaya lakwezinye indawo lapho abathuthukisa khona inotho kazulu.
“Ibandla lePDZ limele intando kazulu. Njenge PDZ siqala ngokuncedisa abantu esibenzela inhlelo ezinengi okwenzela ukuthi baziphilise. Yinto esesiyenze le. Ngikhuluma kanje silenhlelo eMacheke lapho esiyenze uhlelo lwemakhowa kuthi-ke eKezi sinceda uzulu kuhlelo lwenkukhu. Kwezinye indawo sibancedisa ukwenza amasepa.”
UMoyo uthe nxa bengangena embusweni lamuhla bengazama ngamandla wonke ukuthi bathuthukise ukusebenza kweZimbabwe Revenue Authority engani kayenzi kahle.
Uthe kukhanya engani eyinye imali iphelela izikwamenzi zezisebenzi kanye leziphathamandla kahulumende kulokuthi itholwe nguzulu.
Your browser doesn’t support HTML5
Ingxoxo Esiyenze LoMnu. Norris Moyo
Ukuze lizwe okunengi ngodaba hambani ebulembu beInternet ku www.voandebele.com.
NgoLwesibili sixoxa loNkosikazi Thabisile Ncube umqondisi weWomen’s Affairs okubandla le Zimbabwe First kumbe ZimFirst ekhokhelwa nguMaxwell Shumba.
Lolu ludaba lwakuqala lwendaba zombusazwe eZimbabwe esizabe silethulela lona kusukela ngoMvulo kuze kuyefika ngoLwesihlanu lapho esizabe sikhuluma lenkokheli yamabandla atshiyeneyo.