Idale lephalamende seliqale uphenyo phezu kwemisebenzi yenkohlakalo ebikwa yabakhona ekuphiweni kwenkampani yeSakunda Holdings leyeIntratrek umsebenzi wokwakhela iZesa izititshi zamandla kagetsi.
Amankampani la abhadalwa izigidi zamadola nguhulumende kodwa kawenzanga kuhle umsebenzi.
Ikomidi yephalamende ebona ngokusetshenziswa kwemali kahulumende isungule uphenyo lolu ngoMvulo ngokubuzisisa umqondisi weZesa uMnu Sydney Gaya ukuthi amankampani womabili aphiwa njani umsebenzi lokuthi kahle-kahle kuyini okwenza ehluleka ukuqhuba lumsebenzi lanxa nje ahlawulwa.
Inkampani yeSakunda Holdings, yona ekhokhelwa ngumcebisi kaMongameli Emmerson Mnangagwa, uMnu Kudakwashe Tagwirei yaphiwa umsebenzi wokwakha isititshi samagetsi esasizasebenza ngedizili eDema.
Kodwa isimanga yikuthi umsebenzi lo wawuqale waphiwa enye inkampani yaseMelika yasiwuthathelwa waphiwa iSakunda lanxa yayingazange iwudinge lumsebenzi.
Inkampani yeIntratrek, yona ekhokhelwa nguMnu Wicknell Chivayo, yaphiwa umsebenzi wokwakha isititshi sokuthapha amandla kagetsi nge-solar eGwanda kodwa akulalutho osoluphumile lanxa layo yahlawulwa izigidi zezimali kahulumende.
Umkhokheli weZesa wehluleke ukuphendula imibuzo yamalunga ephalamende esithi kalazo impendulo ngamankampani womabili, okwenze lelidale lamlaya ukuthi ayedinga impendulo aphenduke njalo ngoMvulo.
Ingcwethi kwezenotho uMnu Reggie Shoko utshele iStudio 7 ukuthi uphenyo lolu luqakathekile ngoba uzulu kumele ahlale esazi ukuthi imali yakhe isetshenziswa njani.
“Yinto eqakathekileyo leyo ukuthi yenzakale lapho okulemali khona ngoba singekela ukufaka ilihlo lokhozi, siyakwazi ukuthi imali yimpande yesono,” kutsho uMnu Shoko.
Kodwa lanxa kunjalo, uShoko uthi uphenyo lolu lungaba soluphuzile ngoba kudaba amankampani womabili abhadalwa.
Ingcwethi kwezombusazwe uMnu Effie Dlela Ncube laye utshele lumsakazo ukuthi ngempela udaba lolu kumele lucwayisiswe ukuze ichaywe sobala imisebenzi yenkohlakalo nxa ikhona.
“Kuyinto enhle ukubona besukuma abedale lephalamende bedingisisa ukuba inkohlakalo ingaba ingaphi kuZesa ngokuba iphalamende yethu idiniwe, ikhululwe yiZanu,” kutsho uMnu Ncube.
Enye njalo ingcwethi kwezenotho uMnu Masimba Kuchera uthi lanxa kuyinto enhle enziwa yiphalamende, idale leli lakho ukwehluleka ukuzithola impendulo.
“Ngokubona kwami kuzaba nzima sibili ukuthi iphalamende ithole impendulo eneleyo evela kuZesa lakwamanye amankampani ngoba inkohlakalo le ayiqali khona eZesa, iqalela phezulu,” kutsho uMnu Kuchera.
Asenelisanga ukukhuluma loGata ngaloludaba.
Kodwa uMongameli Emmerson Mnangagwa uthi uhulumende wakhe uzimisebe ukulwisana lenkohlakalo kungakhathalekile ukuthi yenziwa ngubani.
Your browser doesn’t support HTML5
Udaba Siluphiwa nguNtungamili Nkomo