Olwela amalungelo oluntu othunjwe ngoMbimbitho uMnu Itai Dzamara ufikise inyanga eziyisitshiyagalolunye enyamalele namuhla kungazakali ukuthi usaphila na kumbe hatshi.
UDzamara, yena owayevame ukutshengisela labangane bakhe besola umbuso kaMongameli Mugabe eAfrica Unity Square, wathunjwa ngabantu abanakanelwa ukuthi basebenzela uhulumende weZanu PF.
Lanxa umthethwandaba walaya amapholisa ukuthi adinge uDzamara eqinile njalo azise imuli yakhe ngokuthi sefike ngaphi ngemizamo yawo, akwenzakali lokhu.
Ilanga lokunyamalala kukaDzamara liza lapho ilizwe likhangelelwe ukubambana lamanya amazwe ekunanzeni ilanga lamalungelo oluntu eleHuman Rights Day ngoLwesine.
Omunye owayevame ukutshengisela loDzamara uMnu Charles Nyoni usole kakhulu uhulumende weZanu PF esithi nguye okwaziyo ukuthi uDzamara waya ngaphi.
"Kuyadanisa ukuthi sefikise inyanga ezingu-9 engazakali ukuthi ungaphi, kutshengisa ukuthi uhulumende kaphathekanga ngokumdinga," kutsho uMnu Nyoni.
Your browser doesn’t support HTML5
Ingxoxo loMnu Charles Nyoni