Abatsha ababekubandla le MDC-T ngomnyaka ka 2014, lingakachezuki, namhlanje bamanyane bathatha isigodlo salelo bandla ese Morgan Tsvangirai House, esiseHarare, besithi sebefuna kuyiwe emhlanganweni omkhulu oweExtra Ordinary Congress, ohlanganisa inkokheli yamacele wonke asechezukile agoqela iMDC-T ekhokhelwa nguNkosazana Thokozani Khuphe leMDC Alliance ekhokhelwa nguMnu. Nelson Chamisa labanye.
Okumangalise abanengi elizweni jikelele yikubona intsha ye MDC T ekhokhelwa nguMaKhupe leyeMDC Alliance ekhokhelwa nguChamisa zivumela into yinye eyokuthi inkokheli yamacele wonke ihlale phansi ikhulumisane ilungisise okungabe kubangela ukufuthelana kwamacele wonke, okwabangela ukugcezuka kwebandla.
Umgcinisihlakalo wecele leMDC-T uMnu Morgen Komichi laye ube esemhlanganweni lo ekhuthaza ukuba iqula lika Chamisa lelika Khupe limanyane.
Kodwa unobhala we MDC-T uMnu Douglas Mwonzora, uthe lokho okwenzakale eHarvest house akukho emthethweni esithi ibandla lakhe lizakuya emthethwandaba.
“Yisikhathi kuphela sizathatha okungokukwethu okungokwethu sizakuthatha. Babuye izolo benza ubudlwangudlwangu besethusela abaqade begcine lindawo basebengenga”
Kodwa isikhulumeli se MDC Alliance uMnu Magalela Mafa uthe elakhe icele lisake lime libone lapho okuzawela induku loxakuxaku.
“Ngeqiniso lathi sizakhangela sibone ukuba kuyangaphi ngoba lawa ngama structures ka 2014. Sizabona ukuba kuzahamba njani”
Omunye wabatsha owaye ngu Mcgginisihlalo wabatsha eHarare iMDC-T ingakachezuki, uMnu Gorekore uthi sebediniwe ngokufuthelana okukhona phakathi kwamacele aleli bandla okubatshiya bona njengabasakhulayo bengasazi ukuthi balandele kuphi.
“Sinxusa inkokheli ukuba ibuye ibe lokuhlala lapha kungela kulwisana. Sifuna babambane. Angisoze ngibahlukumeze. Sibambanise inkonkeli”
Bekugcwele amapholisa esigodwelni seHarvest House ezama ukulondoloza ukuthula lokuvikela ukulimala kwabantu. Kulabantu abambalwa ababikwa bebotshiwe besetheswa icala lokungena emahofisini angasiwo abo abacatshangelwa ukuba ngabe MDC Alliance.
Umthethwandaba waphezulu wanquma ukuba isigodlo seMorgan Tsvangirai House kumele sibe sezandleni secele leMDC T ngemva kokuba icele leMDC Alliance elikhokhelwa nguChamisa lihluthunelwe lesi sigodlo ngoMabasa lonyaka lisithi likhulelwe ngoba abelinye icele bencediswe ngabezomvikela bakahulumende okuludaba olulandulwa yibo kuze kube namhlanje.