Intengo yenhlanyelo lamakhuba okulima isikhuphukile osekutshiye izakhamizi zemaphandleni zingelathemba lokulima lonyaka. Lokhu kuza ngesikhathi inengi liphakathi kwendlala embi eyabangelwa yikungani kuhle kwezulu.
Inhlanyelo yomumbu elesisindo samakhilogramu alitshumi 10Kg Ibiza phose amadola angamakhulu amane ZW$395 kuthi ikhuba lokulima libiza amadola angaphezulu kwenkulungwane ezinhlanu ZW$5400 ezitolo zeGwanda.
Ukuqonga kwentengo yenhlanyelo lokhu kuza ngesikhathi inengi emaphandleni selilungiselela ukulima.
UMnu Dennis Ncube isakhamuzi seNyandeni uthi ukudula kwenhlanyelo lokhu kuzadala ukuthi inengi lezakhamizi lehluleke ukulima lonyaka.
Amazwi akhe agcizelelwe nguMnu Gabriel Moyo oweMawane othi ukuma manzonzo komnotho welizwe sokudinga ukuthi kuhlanganiswe amakhanda ukuze kube lentuthuko elizweni.
Ukhansila kaWard 13 uMnu Miclas Ndlovu uthi balinde uhlelo lukahulumende lwenhlanyelo olulokhu lungakafiki esigabeni sabo okwamanje.
Esethula umbiko we State of the Nation Address kuliviki edale lephalamende, uMongameli Emmerson Mnangagwa uthe uhulumende uzakhupha imali yokuthenga inhlanyelo phansi kohlelo lweCommand Agriculture ezaphiwa abalimi emakhaya.
Kusenjalo inengi likhala ngendlala kulumhlubulo. UNkosikazi Thembinkosi Moyo oweGaranyemba uthi bayaluswela uncedo lukahulumende kungenani lokuthi bahlaselwe yindlala.
Ngaphandle kokudla, amanzi okunatha sesilela eMawane, kutsho uMnu Benson Dube.
Izifuyo ezibalisa inkomo lazo zibhekane lodubo lokusilela kwamanzi njalo abogatsha lwezokulima bathi sezifika amakhulu amathathu inkomo esezifile kulesisabelo ngenxa yendlala.
Your browser doesn’t support HTML5
UAlbert Ncube Uyalandisa