Intengo yamafutha ezimota isikhuphulwe okwesine lokhe lumnyaka uqalisileyo. Lokhu sekudanise abantu ngamandla bevele bebhekane lendubo zokuqonga kwentengo yemphahla yonke lokudla abathi isizaphinda iqanse ngamanda ngemva kokukhwezwa kwentengo yamafutha ezimotha namhlanje.
Uzulu weZimbabwe uthi impilo iqhubeka isiba nzima ngamandla uhulumende ekhanya enganaki abantu bakhe ngakwenzayo ukukhuphula amafutha ezimotha mahlayana.
Umnumzana Effort Ncube, unobhala jikelele wenhlanganiso emela ilungelo labathengi eyeNational Consumer Rights Association uthi uzulu wamukele ngokudana okukhulu ukukhwezwa kwentengo yamafutha ezimota.
“Ukukhwela kwe fuel kuyinto engamulekelanga kuzakhamuzi zeZimbambwe, kubathengi beZimbabwe ngokuba vele kuzakwenza ukuthi zonke izinto zikhwele njengoba I fuel, kuyiyo ekhweza zonke izinto. Akulanto ezasala ingakhwelanga, kuzalandela isinkwa, iziwiji zabantwana, itshukela imphuphu,kulandele konke i transport. I fuel ikhwela, ikhweze yonke into, isizwe sesingene phakathi kosizi, uhulumende kathathe inyathelo lokulungisa lento le, ingakahluphi, ingakabi banzi ihlupha abantu ngendlela eyisimangaliso. Akwamukelekanga lokhu okwenzakalayo kuyabonisa ukuthi isimo se economy asimanga kahle, sidinga ukuthi silungiswe masinyane.”
Isikhuphukile intengo yezimotha
Omunye usomabhizimusi othengisa amafutha ezimota umnumzana Ndaba Nyoni uthi bahamba ngomumo welizwe, ababathengiselayo bakhwezile ngakho labo benza okufanayo.
“Njenga bamagaraji akulanto esingayenza ifuel bayakhala bathi ikhwelile lathi siyahoda phela la esiyithatha khona siyithatha lathi ikhwelile coz angeke siyithathe idula ngale sibuye sizoyitshiphisa ngapha siyabe singasayenzi ibusiness. Ukuze ibusiness ihambe lathi kumele siyhole iprofit ukuze sihode futhi kusasa yiyo ibusiness sihamba nge situation ekhona amasupplier akhwezile lathi siyakhweza.’’
Umnunzana Calton Zulu umtshayeli womtshova koBulawayo uthi lokhu kuyabalimaza ngoba bengenelisi ukukhweza imbadalo yokugada bona besanda kuyikhweza.
“Thina njengabatshayeli bemtshova ukukhwela kwefuel kusilimazile kakhulu. Umtshova singakhweza siye ku2 dollars loba singakhweza siye ku2.50 abantu ngeke begade ngoba amabhasi yi50c, so ukukhwela kwefuel lokhu kuyasilimaza kakhulu akusasebenzeki coz ukuze sisebenze umtshova kuyabe sekumele ube 3.50 akulamuntu ozayikwanisa leyo imali abanye abantu bagada everyday abanye njalo bagada three times a day umtshova njengabantwana besikolo akwenzi ukuthi begase amabhasi coz bayabe bezaphuza ukuthi bafike esikolo lathi siyabe singela choice ukuthi siyihlalise ikhonapho ku2dollars kuyabe sekusifosa sicine sikhweza.”
Unkosikazi Sihle Dlodlo ongumzali uthi yena uHulumende akangenele ekulungisiseni umumo osukhona elizweni.
‘Silokudana okukhulu ngomumo lowu osukhona eZimbabwe okumele sithwale abantwana sibase ezikolo lathi siphinde siye emsebenzini .Kubanzima kakhulu ngoba intengo zezinto ezintolo lokhe ziqansa khathesi ukuthi abantwana siyabahambisa sithini ezikoloasikwazi ngakho besicela uHulumende angenele ekwehliseni intengo yamafutha ezimota .Langaze athi ufake amabhasi ique ekhona laphana ayivumi banzima kithi esiyabe sigijimisa isikhathi esiya emsebenzini njalo sihambisa abantwana so besicela ukuthi uhulumende angenele kulokho.’’
Umumo wokukhuphulwa kwentengo yamafutha ezimota kanengi nengi eZimbabwe usudanise abantu bonke elizweni besithi abasakwazi ukuthi umunyaka lapho ozaphela khona bayabe sebekusiphi isimo.
Bathi inhlupho ababhekane lazo zingani zenziwa ngabomo ngoba ukukhwezwa kwentengo yamafutha kuyikho okudala ukuthi intengo yento yonke ikhwele ezitolo.
Your browser doesn’t support HTML5
Udaba lokukhwezwa kwenengo yamafutha ezimotha siluphiwa nguBathabile Masuku