Ilizwe leZimbabwe libhekane lenhlupho ezinengi kwezempilakahle okugoqela umkhuhlane wesihudo osubulele abantu phose abangamatshumi amahlanu, ukuselakala kwemisebenzi, ukuswelakala kwemali, odokotela labongi kanye lemithi yokwelapha uzulu.
Okwamanje ilizwe lilwisana lonkhuhlane wesihudo owaqalisa eHarare wamemetheka kancane kancane waze waqhamuka lako Bulawayo lapho osubulele umuntu oyedwa.
Abantu bahlupheka okumangalisayo ezibhedlela lapho okungela mithi khona lemitshina yokuhlola izigulane.
Sebejayele ukutshengisela odokotela kwele Zimbabwe.
Umongikazi kwesinye isibhedlela esikhulu elizweni, uSister Happiness Ndlovu, uthi izibhedlela ezinengi ziyasilela imitshina eminengi ukuthi kwelatshwe izigulane njalo ukuya kulaba abazimele bodwa kuyadula kakhulu.
“Ama health institutions ethu kawala mitshina efunakalayo. Lapha sikhuluma ngamaDialisis machine, abanengi koBulawayo bacina besiya eHarare. Kuma private institutions kuyadula njalo abantu abala maMedical Aid.”
Ekhuluma ngomumo wezibhedlela kanye lokutholakala kwabodokotela abalolwazi olujulileyo ngemikhuhlane ethile amaSpecialist, UDokotela Gibson Mhlanga onguPrincipal Director owePreventive Services egatsheni lwezempilakahle, uthi balohlupho lokuswela ingcwethi zemikhuhlane ngakho bazama ukufundisa odokotela besebenzelana labeUniversity of Zimbabwe.
“Kusukela iminyaka eminengi edlulileyo besilenkinga yokuswela ama specialist, ama specialist amanengi abetholakala eHarare, manje njenge government besisebenza leUniversity of Zimbabwe besi sponsor amadoctors ethu ukuthi afundele ukuba ngospecialist abesebuyela emadolobheni asuka kiwo kodwa besilohlupho lokuthi bengaqeda abafuni ukubuyela basuke bafune ukuhlala eHarare.”
Banengi abagula umkhuhlane wesihudo eZimbabwe.
UNkosikazi Mable Nyathi, isakhamusi sako Bulawayo, uthi ezibhedlela lapha okwanelisa khona uzulu kunzima ukuthi bathole amaphilisi njalo odokotela abakhangele imikhuhlane ethize abatholakali ngaphandle kokuya kwamanye amazwe.
“Ezibhedlela zethu oMpilo lapha esenelisa khona ukungena khona thina uzulu aselatshwa ngemfanelo ngoba uzathola ukuthi umama ozithweleyo okuthiwa iBP yakhe iphezulu uyabhalelwa amaphilisi ukuthi ayewadinga.”
Isimo sezempilakahle asithabisi uzulu ngoba impilo yakhe ihlala isengozini. Inhlanganiso ezinengi ezizimele zodwa kunye lezamabandla okholo sezasungula inhlangothi zazo ezokulwisana lemikhuhlane emhlabeni jikelele njalo ziyaphathisa uhulemende ngendlela. Khathesi uhulumende umelane lomkhuhlane weCholera kunye leTyphoid okuzaphinde kusinde ukulwisana laye nxa abantu bengasebenzi ndawonye.
Inhlanganiso yeWorld Health Organisation yethule umbiko mayelana leCholera isithi isiqinisa imizamo yayo yokulwisana lalo umkhuhlane osumemetheka ngesiqubu edolobheni leHarare. Inani labantu aselahlekelwe ngumpefumulo selingamatshumi phose amahlanu.
Eyinye njalo inhlanganiso eye UNICEF layo eyingxenye yomkhankaso wokulwisana lomkhuhklane lo, icebise uzulu ukuthi avikele ukumemethekisa umkhuhlane lo ngokuhlala ehlanzekile izandla, ukunatha amanzi ahlanzekileyo lokupheka ukudla okwesikhathi eside.
Your browser doesn’t support HTML5
Udaba lwenhlupho ezibhekane logatsha lwezempilakahle siluphiwa nguBathabile Masuku