Umhlangano womanyano wamazwe omhlaba, owe United Nations General Assembly, uqhubekele phambili ngapha kweleMelika edolobheni le New York lapho umongameli Robert Mugabe akhangelelwe ukwethula amazwi akhe namhla kusihlwa.
Okumqoka osekuphethwe kulumhlangano yikuthathwa kwezibopho ezimele zifezwe eminyakeni elandelayo ezizakwelama ama Millenium Goals ezibizwa ngokuthi ngama Sustainable Development Goals.
Namhla inkokheli embalwa ebalisa uMongale, owe China uMnu. Xi, inkosi uAbdullah wakwele Jordan, uMongameli Vladir Putin wakwele Russia labanye bethule amazwi abo.
Umongameli, Barack Obama weleMelika embikweni wakhe uphathe indaba ezigoqela ukumanyana kwamazwe ekuqedeni indubo zomhlaba ezibalisa amalwecatsha awe Isis.
Kutsho u Obama: “Ngimi phambi kwenu namhla ngikholwa ukuthi njengenkokheli yamazwe omhlaba akusamelanga ukuthi siphindele emuva ngendlela zobudlwangudlwangu lolaka. Asingeke sikhangele emuva.”
Your browser doesn’t support HTML5
Amazwi kaMongameli Barack Obama
NgoMgqibelo uMongameli Mugabe wethule amazwi akhe kuhlangothi lwe United Nations oluhlaziye ama Sustainable Development Goals.
Emazwini akhe uMongameli Mugabe uthe lanxa eleZimbabwe lizimisele ukufinyelele imigoqo ye Sustainable Goals ingxaki yikuthi ilizwe liphakathi kobunzima obudalwe yizijeziso zenotho.
Ukuhlaziya amazwi kaMongameli Mugabe uChris Gande weStudio Seven uxoxe lengcwethi ecubungula ezombusazwe, uMnu. Brilliant Mhlanga othi akumangalisi ukuthi uMongameli Mugabe ukweleMelika emhlanganweni lo ngoba uvele umele wenziwe.
“Yikho esihlala sikutsho ukuthi uMongameli Mugabe utshaphaza imali ngoba ehlala ehamba umhlaba wonke elequla elikhulu,” kutsho uMhlanga.
Your browser doesn’t support HTML5
Ingxoxo loMnu. Brilliant Mhlanga