Inkokheli yamazwe womhlaba labaphathintambo balamazwe bathe gwaqa eNew York emhlanganweni omkhulu wenhlanganiso yomanyano wamazwe omhlaba owe United Nations General Assembly.
Kulemhlangano eminengi ezangenwa yiziphathamandla zabohulumende, amalunga enhlanganiso ezizimele zodwa kanye labanye abantu abakhangele inhlangothI ezitshiyeneyo okubalisa ezomnotho, indlala, ezempilakahle, ezemfundo, okweziphepheli lesimo somkhathi emhlabeni jikelele.
Konke lokhu kwenzakala ngesikhathi kulebhomba elidubuke eNew York izolo osokusenza kube lokuxokozela elodolobheni leli ikakhulu kulabo abakhangelane lezomvikela elizweni leMelika.
Kusenjalo, UMongameli Robert Mugabe usemhlanganweni lo, ngesikhathi kulezizalwane zeZimbabwe ezihlala eMelika ekade zitshengisela ngempelaviki phandle kwesigodlo seUnited Nations zikhonona ngesimo esibi somnotho ekhaya langombuso wakhe abathi ngowocuku.
UMugabe, okhulume emhlanganweni okhangelane leziphepheli, ukhuthaze amazwe omhlaba ukuthi kumele ayenze konke okusemandleni awo ukuthi enqabele impi zomvukela.
“Iziphepheli ezinengi ziyenziwa ngabantu. Ngakho-ke kuyafunakala ukuthi abantu bakhumisane umlotha njengalokhu okumele kwenziwa ngaphansi kweziqondiso zomthetho weUnited Nations kulokuthi balwisane ngezikhali. Angwele amazwe akunhlanganiso ye United Nations ayehluleka ukulungisa okubahluphayo acine esiphula amalungelo abantu.
“Lokhu kwenza ukuthi kubeleziphepheli ezinengi emhlabeni jikelele. Bagcele ababusayo abenza konke lokhu loba bebalutshwana emazweni abo. Kukhona njalo imizamo yokuthi kulwisane lamalwecatsha okwenza ukuthi ilungelo likazulu lephulwe. Lokhu kwenziwa ngesikhathi amazwe eliswana lamalwecatsha.”
Your browser doesn’t support HTML5
UMongameli Robert Mugabe Ukhuluma eUnited Nations
UMugabe engakahambi emhlanganweni lo, kulezizalwane zeZimbabwe ekade zikhulekela ukuthi kubelenguquko etshiyeneyo ekhaya lapho uzulu athwele khona nzima ngokuswela umsebenzi lendlela zokuziphandela.
Omunye walabo abakade bekhuleka nguMnu. Kudzai Samaita otshele iStudio 7 ukuthi kunengi okumele kulungiswe eZimbabwe.
Your browser doesn’t support HTML5
Ingxoxo Esiyenze LoMnu. Kudzai Samaita eNew York
NgoMgqibelo bekulamalunga enhlanganiso esekele uMugabe ebizwa ngokuthi yiDecember 12 Movement akade etshengisela sikhathi sinye izizalwane zeZimbabwe lazo zitshengisela ngale komgwaqo maqondaba labo zisola okwenzakala elizweni.
Amalunga eDecember 12 Movement athe asekela indlela uMugabe athathela ngayo abamhlophe amapulazi lokuvimba ukuhuquluzwa komnotho wezwekazi leAfrica ngabamhlophe.