Sekusele amaqembu omdlalo wenguqu amane alokhu elethuba lokuthola inkezo ye NetOne One Wallet Cup yenkulungwane ezingamatshumi ayitshiyagalo mbili zamadollar-$80 000, ngemva kwemidlalo ebikhona ngempelaviki edluleyo.
Amaqembu athi ele Dynamos, ele Chicken Inn, ele Triangle kanye lele How Mine yiwo afinyelele kusigaba se semi-final kumncintiswano wenkezo ye NetOne One Wallet ngemva kokuphumelela kwawo emidlalweni ebikhona ngempelaviki.
Linkezo idlalwa ngamaqembu ayitshiyagalombili aqede imidlalo yanyakenye ekusigaba saphezulu esengalane yemiklomelo njalo kulawo aqede ekundawo ezine zaphezulu intshantshu zanyakenye iqembu le Dynamos yilo kuphela elenelise ukudlulela kusigaba esilandelayo ngemva kokukhulela omakhelwane balo iqembu le CAPS United.
Nyakenye linkezo yayisekelwa ngemali libhanga le BancABC njalo yathathwa liqembu le Shabanie Mine lona elingenelisanga ukuyivikela ngoba liqede likusigaba sangaphansi kwengalane.
Amaqembu athi eleHighlanders lona elikhutshwe ngele How Mine, ele CAPS United, ele FC Platinum lona elidliwe ngele Chicken Inn kanye lele Harare City eligunyulwe ngele Triangle, azathola inkulungwane ezingamatshumi amabili ngemva kokuphatheka kwawo kumidlalo ye quarter – final kuthi lawo azaphelela kusigaba esilandelayo ese semi-final azathola inkulungwane ezingamatshumi amathathu.
Iqembu elizaphakamisa inkezo lizathola inkulungwane ezingamatshumi ayitshiyagalo mbili kuthi elizanqotshwa ku final lizathola inkulungwane ezingamatshumi amahlanu. Uhlelo lokuba amaqembu azaxegwa njani kusigaba esilandelayo lukhangelelwe ukuba luqhutshwe kuyonale iviki.
Sikhangele umdlalo kakhilikithi;
Iqembu elimela ilizwe leZimbabwe emdlalweni kakhilikithi liyazithaphuzela kuqembu lezivakatshi ele Afghanistan njengoba selinqobe kumidlalo emibili eyohlobo lwe One Day International eseliyidlale laleliqembu enkundleni yeQueens Sports Club.
Emdlalweni wakuqala obekhona ngoLwesihlanu iqembu le Zimbabwe linqobe ngama wickets ayisithupha kusele amabhola angamatshumi amabili lathobaminwe mbili ukuba liqede ama overs alo angamatshumi amahlanu.
NgeNsonto emdlalweni wesibili iqembu le Zimbabwe linqobe ngama wickets ayithoba minwe mbili kusele amabhola angamatshumi amathathu lathoba munwe munwe ukuba liqede ama overs alo angamatshumi amahlanu.
Imidlalo iqhubekela phambili kusasa ngoLwesibili lapho okuzadlalwa khona umdlalo wesithathu kuthi umdlalo wesine uzakuba khona ngoLwesine khona njalo enkundleni ye Queens Sports Club.
Ngemva kwalokho lawa maqembu azabhekisa amabombo esigodlweni iHarare lapho iqembu le Zimbabwe A elizadlala imidlalo emibili lele Afghanistan edlalwa phakathi kwamalanga amane.
Umdlalo wakuqala uzakuba khona kusukela mhlaka 27 kusiyafika mhlaka 30 ekupheleni kwenyanga ka Ntulikazi kube sekusithi owesibili ubekhona ekuqaleni kwenyanga kaNcwabakazi mhla zimbili uphele mhla zinhlanu.