Umthethwandaba kamantshi walile ngoLwesihlanu ukukhulula intathelizindaba esebenzela umsakazo weHSTV lephephandaba leNewsDay uBlessed Mhlanga ngemali yesibambiso i-bail, usithi ukukhululwa kwakhe kulakho ukuphazamisa ukuthula kumbe ukuphehla udlakela elizweni.
UMhlanga uzaqhubeka evalelwe kulandela ukubotshwa kwakhe ngoMvulo abesephenduka enkantolo mhlaka 14 ngenyanga ezayo.
Abatshutshisi bathi uMhlanga wephula umthetho ngokwethula imbiko etshotshozela udlakela kungxoxo azenza loMnu Blessed Geza, yena okhokhela abalwa impi yenkululeko abathi uMongameli Emmerson Mnangagwa kumele asuke embusweni.
Ukuncitshwa kukaMhlanga i-bail kusolwe kakhulu zinhlanganiso zentathelizindaba ezifana leyeZimbabwe Union of Journalists, i-ZUJ.
Unobhala jikelele wenhlanganiso yeZimbabwe Union of Journalists uPerfect Hlongwane. (Pic credit: Tobias Mudzingwa/VOA)
Unobhala jikelele walinhlanganiso uMnu Perfect Hlongwane utshele iStudio 7 ukuthi badangele ngoba uhulumende eqhubeka ngomkhuba wokuncindezela intathelizindaba.
Your browser doesn’t support HTML5
Ingxoxo loMnu Perfect Hlongwane
Amazwi kaHlongwane agzizelelwe ngumkhokheli wenhlanganiso yeYoung Journalists Association uMnu Leo Munhende, yena othi intathelizindaba ezinengi sezisesaba ukwenza umsebenzi wazo zikhululekile.
Your browser doesn’t support HTML5
Ingxoxo loMnu Leo Munhende
Umnikazi wenkampani yeAlpha Media Holdings, elawula amaphephandaba abalisa eleNewsDay, eleStandard leleIndependent kanye lomsakazi kamabonakude oweHSTV uMnu Trevor Ncube laye usole ukuncitshwa kukaMhlanga i-bail.
Umnikazi wenkampani yeAlpha Media Holdings uMnu Trevor Ncube. (Pic credit: Tobias Mudzingwa/VOA)
Uthe kusobala ukuthi imithethwandaba yenza intando kaMnangagwa.
Kodwa unobhala wogatsha lukahulumende olubona ngokwethulwa kwemibiko uMnu Nick Mangwana utshele iStudio 7 ukuthi uMnu Ncube ukhuluma amanyala.