Umthethwandaba kamansthi koBulawayo usulaye umphathintambo wendaba zasekhaya uMnu Kazembe Kazembe, usikomitshi wamapholisa uMnu Godwin Matanga kanye lelinye ipholisa ukuthi babhadale usomabhizimusi uMnu Joseph Tambu inkulungwane zamadola aseMelika ezilitshumi, US$10,000 phezu kokubotshwa lokuvalelwa kwakhe esitokisini okwensuku ezimbili ngaphandle komthetho.
UTambu, ongumqondisi wenkampani yeProd Software Enterprises wabotshwa ngo2021 ngemva kokumangalelwa yiGwanda State University isithi wayehluleke ukuletha i-camera eyayithengwe yilelikolitshi kunkampani yakhe.
Lokhu kwadala ukuthi uTambu abotshwe kodwa wakhululwa engetheswanga cala, okwabangela ukuthi amangalele amapholisa labakhulu bawo.
Zinengi izehlakalo ezifanayo lapho amapholisa asebanjwe khona yinkantolo ngamandla ukuthi babhadale abantu ngemva kokwephula amalungelo abo.
Ingcwethi kwezombusazwe uMnu Effie Dlela Ncube utshele iStudio 7 ukuthi izijeziso ezinje zidlala indima enkulu ekulondolozeni amalungelo kazulu.
Your browser doesn’t support HTML5
Ingxoxo loMnu Effie Dlela Ncube