Inkampani yamahotela iRainbow Tourism Group esisehluleka ukubhadala isikwelede sezigidi ezilitshumi lanhlanu zamadola eMelika, ibikwa ilakho ukuvalwa nxa ingabhadalanga isikwelede lesi lobanje abaqondisi bayo besithi lokhe ilemali yokuqhuba umsebenzi.
Abaqondisi benkampani le babikwa sebevumelene ukuthi kuthengiswe eyinye yamahotela ayo iBulawayo Rainbow ukuze badinge izigidi ezilitshumi zamadola. Ikhangelele ukudinga njalo ezinye izigidi ezinhlanu zamadola emkambo wemali.
Inkampani le ithi lokhu kumele kwenziwe ngesiphangiphangi njengoba ibhanga le Eastern and Southern African Trade and Development Bank elaziwa kakhulu ngokuthi yi Preferential Trade Area (PTA) Bank selifuna imali yalo eyabolekwa yiRainbow Group.
Umnu. Ibbo Mandaza owake waba ngumgcinisihlalo we Rainbow uthi akwenzakali ukuthi inkampani le ivalwe njengoba ilamahotela amakhulu eZimbabwe.
UMandaza uthi okubulala iRainbow ngosomabhizimusi abafuna ukungena kunkampani le bedinga ukwenza imali bengafakanga lutho kuyo.
Uthi isivumelwano se Rainbow le National Social Security Authority (NSSA) sizakwenza ukuthi inkampani le ibelamandla okuthenga ihotela ye Bulawayo Rainbow ngokuya kwesikhathi.
Umnu. Masimba Kuchera ingcwethi kwezenotho uthi iRainbow isiphelelwe ngamaqhinga wonke wokuthola inzuzo yikhonje osokusenza ithengise i-Bulawayo Rainbow ukwenzela ukubhadala isikwelede se PTA Bank.
