Inkampani ye Impala Platinum Holdings (Pvt) Limited ithi isiqalisile ukukhulumisana lohulumende we Zimbabwe ngokwabela uzulu amashares kuhlelo lwe indigenization kulandela ukwala kukahulumende ukuthi ayamukele amashares angaba yisilinganiso sokungamatshumi amabili lanhlanu ekhulwini-25%.
Unkosikazi Busi Chindove, oyisikhulumeli senkampani yeZimbabwe Platinum Holdings engaphansi kwe Impala Holdings, uthi inkulumo lezi zikhangelelwe ukuthi zibe lempumela ezathokozisa iZimplats lohulumende.
Unkosikazi Chindove uthi kangeke atsho ukuthi inkampani le izathengisela uzulu amashares alinani elinganani.
Kusobala ukuthi iZimplats ifuna ukuthi amashares amanye iwabele uzulu ngokwakha izikolo, amadamu, izibhedlela lokunye okutshiyeneyo.
Ingcwethi kwezenotho lezombusazwe uMnu. Rejoice Ngwenya uthi akaboni uhulumende evuma ukuthi iZimplats yabele uzulu amashares angaphansi kwalokho okufunakalayo kuhlelo lwe indigenization.
