Inhlanganiso zabatsha ezizimeleyo lezamabandla ezombusazwe zithi seziqinisa imikhankaso yazo yokuncedisa abatsha ukuthi bebhalise ukuze bathole ilungelo lokuvota njalo sezibhalele ihofisi kamsitheli ukuthi ingafaki imigoqo eminengi kuloluhlelo.
Inhlanganiso ebona ngokuqhutshwa kokhetho eye Zimbabwe Election Support Network isanda kukhupha umbiko otshengisa ukuthi ihlekana labatsha elingaba yisilinganiso phose amatshumi amabili ekhulwini-18%, libonakala kuVoters’ Roll kukanti ilizwe lilabatsha abanengi abangafika kusilinaniso sokungamatshumi ayisithupha ekhulwini- 60%.
Inhlanganiso eziphatheke kuloluhlelo zigoqela eye Youth Forum kanye leye Youth Initiative for Democracy in Zimbabwe.
UMnu. Promise Mkhwananzi, unobhala jikelele wabatsha kucele le MDC elikhokhelwa nguMnu. Morgan Tsvangirai utshele uSithandekile Mhlanga we Studio 7 ukuthi bakhangelele ukuthi abatsha balelibandla abedlula isigidi esisodwa benelise ukubhalisela ukuvota.