Abenhlanganiso eyeInter-Parliamentary Union (IPU) Assembly isisole kakhulu ukuvalelwa lokuhlaliswa ejele okwesikhathi iside kowayengummeli weZengeze West edale lephalamende, uMnu Job Sikhala, owebandla ele eliphikisayo eleCCC.
Lokhu kuza ngemva kokuba ibandla leCCC likhweze isicelo kunhlanganiso le, eyagamalunga amadale ephalamende emhlabeni jikelele emhlanganweni oqhutshelwe kwele Angola ngeviki edluleyo. AbeCCC bakhonona ngokuxotshwa kwamalunga alo ephalamende angamatshumi amabili lantathu- 23 lokuvalelwa kuka Sikhala besithi kuveza ukuba eleZimbabwe alisela mbuso wentando kazulu.
Idale le-IPU lihle labika ukuba lizathumela iqula lokuyacubungula ngokuhlukunyezwa kuka Sikhala lokuxotshwa kwamalunga awe CCC ephalamende ngozithi ungunombala we CCC uMnu Sengezo Tshabangu.
Ekhuluma ngalokhu, umsekeli wesikhulumeli seCCC, uMnu Gift Ostallos Siziva olilunga leIPU obesemhlanganweni owenzelwe eAngola, uthe sebemelele izithunywa zenhlanganiso le.
"Kuliqiniso ukuba ugatsha lwe IPU luzabuya kuleli ukuzwisisa ukuba udaba lolu luzakwenziwa njani ngoba kusobala ukuba ukuxotshwa kwabo lokuhlala kuka Sikhala ejele akukho emthethweni, siyabamukela njalo sizabatshela konke okwenziwayo ukulwisa amalunga awe CCC ephalamende.
USiziva wazise ukuba kabasoze baphelele kuIPU kuphela esithi inhlanganiso ezifana leyomanyano wamazwe abensundu eyeAfrican Union leyomhlaba eyeUnited Nations kuzamele zaziswe ngesimo esikwele Zimbabwe.
Kodwa umholi weZANU PF edale lephalamende uMnu Togarepi Pupurai uthi akula kuhlukuluzwa okwenziwa uSikhala ethi bazimisele ukutshela iqula leli iqiniso nxa lingeza kwele Zimbabwe.
"Nxa bengafuna ukuza eZimbabwe kuzabe kulungile ukuze bathole iqiniso. Abantu bayatshiya iqiniso betshele amazwe aphandle amanga. Sizimisele ukuba kababuye sibatshele iqiniso. Akulani lebandla lethu lohulumende, zindaba zabo."
Ingcitshi kwezombusazwe zithi lokhu kuqakathekile ukuze amanye amazwe ancedise ekulungiseni inhlupho ezibhekane le Zimbabwe.
Eyinye yalezi ngcwethi, esebenza lenhlanganiso yeRevolutionary Research Institute of Zimbabwe, uMnu Tjenesani Ntungakwa, uthi mhlaumbe lokhu kuzakwenza ezinye inhlanganiso zomhlaba zikhangelesise kabanzi udaba lombuso wase Zimbabwe.
"Siyazi ukuba esikhathini esinengi kuyabuya inhlanganiso ezehlukeneyo zibona isimo sakuleli. Sithemba uhambo lwe IPU kuleli kunganceda ukuba inhlanganiso ezifana labo UN lazo zize ukuzekuzwa ukuba kuyini okwenzakalao ikakhulu kundaba ze democracy lase phalamende yakuleli.”
Imizamo yeStudio 7 yokuzwa imibono kasomlomo wedale lephalamende uMnumzana Jacob Mudenda ngokuza kwequla eleIPU kayiphumelelanga njengoba ubengasadobhi ucingo lwakhe.
Kusenjalo, uSikhala namuhla ufikise iminyaka engamatshumi amahlanu lanye – 51 youkuzalwa.
Abemuli yakhe, abangane lamalunga aweCCC ephalamende bamlande emthethwandaba namhlanje lapho abe emele athoniswe khona bezomfisela ilanga lokuzalwa elihle.
Bamthengele ikhekhe abamnikeze lona icala lakhe lingakaqali ukuthoniswa bamhlabelela lengoma.
Ilunga le CCC ephalamende uNkosikazi Ellen Shiriyedenga uthe kubuhlungu ukuba uSikhala usehlale isikhathi eside kangaka ejele.
"Sizwa ubuhlungu ukuba ubaba uSikhala uyala esejele ngesikhathi sokukwana umnyaka. Sifisa ukuba ngabe uyakhululwa abuyele kumuli yakhe."
USikhala kazange athonisiswe namhlanje ngoba amagqwetha akhe athi uMnu Harrison Nkomo loMnu Jeremiah Bamu bebephathekile kodwa wayevele wala ukuthoniswa namhlanje esithi ufuna ukuphumula ngelanga lakhe lokuzalwa.
Icala lakhe lokutshotshozela udlakela lizaphenduka edale mhlaka 13 wenyanga ezayo kaLwezi.
Kusenjalo, idale lephalamende eleZimbabwe namhlanje liqalile imhlangano yalo yokuzwa imibono kazulu ngohlelo lokubuthaniswa lokusetshenziswa kwesikhwama semali yesizwe nguhulumende somnyaka ozayo, olwe 2024 National Budget.
Owake waba ngumsekeli kamphathintambo wezemali njalo ekhokhela ikhomithi ebona ngokusetshenziswa kwemali ephalamende, uMnu Clemence Chiduwa, uthi bazakuzwa imibono kazulu besebenzisa inkundla yokuxhumana eyebulenjini eye Zoom.
"Okwakhathesi ngenxa yokuba saphuza ukuqala iphalamende asisoze sikwenze lokhu ngokubhoda bhoda. Sizakwenza lokhu sisebenzisa Zoom."
Kodwa inengi labantu lithi lokhu kuzaphazamisa uzulu ukuba aphe imibono yakhe ngoba bengelayo imali yendleko yokuba ebulenjini ku-internet.
Omunye wabasole lokhu ngasizatho sinye sendleko yebulenjini, nguNkosikazi Princess Sibanda isakhamuzi sase Harare.
"Lokhu kuzakwenza ukuba sitsho imbono yethu nge budget ngoba asilamali yokungena ku internet njalo internet ivele isidula. Kuzaphazamisa kumibono yethu.”
Idale lephalamende lithi kalizange lithole isikhathi sokuba libhode lisizwa imibono kazulu lonyaka ngenxa yokuba amakhomithi la ebekwe ephalamende sokusele amalanga amalutshwana ukuba umnyaka uphele.