Inhlanganiso yomanyano wamazwe awe Europe eyeEuropean Union ivuselele ubudlelwano bayo leleZimbabwe ngoMvulo ngokunika ilizwe izigidi ezingamakhulu amabili lamatshumi ayisikhombisa amadollar eMelika – $270 million.
Inhlanganiso le eyamisa ubudlelwano leZimbabwe ikhonona ngokungaqhutshwa kuhle kokhetho elizweni kanye lokwephulwa kwamalungelo oluntu libandla leZanu PF, ithi imali le izasetshenziswa ukuvuselela ezempilakahle lezinye inswelo zikazulu.
Eyinye yale imali engaba yizigidi eziyisithupha zamadollar eMelika - $6 million – izasetshenziswa ukuqhuba inhlelo zenhlanganiso ezizimele zodwa loba nje izanikezwa nguhulumende.
Omele inhlanganiso yeE-U kwele Zimbabwe, uMnu. Phillipe van Damme, utshele iziphathamandla zikahulumende esethula loluncedo eHarare ukuthi kumele isetshenziswe ngemfanelo.
Uphinde wathi kumele ilizwe lihloniphe ilungelo loluntu njalo liguqule indlela yombuso ukwenzela ukuthi kube lokukhululeka elizweni.
Okade emele eleZimbabwe kusethulwa imali le yiE-U, uMnu. Patrick Chinamasa, obona ngezemali yelizwe, ucele uVan Damme ukuthi akhulume labanye bakhe besule izijeziso zenotho ezafakelwa uMongameli Robert Mugabe lomkakhe.
Inhlanganiso le isiyesule izijeziso ezafakelwa abanye abakubandla leZanu PF kanye lamankampani atshiyeneyo. Ukuhlaziya loludaba, uGibbs Dube weStudio 7 uxoxe loMnu. Dumisani Nkomo ingcwethi kwezombusazwe.